Ka lo kir!
Zah te pawh zu zak deuh rum rum ia!
Khatia riah buk rauh san tawh ang maia he hmun ka tihkhawhar vang vang takna khan chhan fahrah te te chu a nei ve a. Puhmawh tur pakhatna chu UK Border Agency an ni! Reilote chawlh hmang zawk a let leh mai tura inngai kha min rawn hauh lovin dan thar min lo siam hnan pek a. Registration, reference number chuti khati an ti a. Kum dangah a tul ngai miau loh avangin ka thawhna lam te'n chutiang lo nei lawk thlip thlep hek lo, kei ka keleawl a, khuti lam an invai buai ta chiam mai a ni.
Chutiang vel teh nuai avang chuan kal mai thei dinhmuna dingin kal mai si lovin, heti lama inbengbel ngam chiah si lovin ka awkai ta vel a. Kan lo heti ta a ni!
Swine flu leh wine flu
India rama ka let leh hun lai vel kha Swine flu hran vanglai kha a ni a. Zan rei tawh lamah Mumbai Airport kan han thleng chu dawhkana thuho leh hmunphiatho thleng mai khan mask an lo vuah fur mai a. Laboratory lian takah kan lut ta emaw tih mai awl tak a ni. Heathrow lamah chutiang hmuh tur an awm ve si lo va. Kolkata Airport-ah pawh chutianga rawn intuam chu Mizo ka hmu hnem mai. Keini hian Swine flu chu kan lo hlau ber a nih hi, te ka ti rilru mai mai a.
Lengpui Airport-a an lo tih dan hlei hlei khan min ti buai! Doctor leh nurse ho hi dawhkan hungin an lo duty ve a. Hming leh address min ziahtirin boarding pass-ah seal an lo chhu ringawt a, a zo chu a ni mai a. Kha khan eng chen chiahin nge swine flu lakah kan ram a venhim dawn tih tak chu ka zawt hman ta lo.
Mihring himna leh hriselna kawnga inthlahdah em em chung sia eng emaw hleka a hleihluaka kan chiai leh thin si zia te ka ngaihtuah zui a. Hmabak kan la ngah mang e, ka ti!
Total prohibition-in a huam tel ve chiah si loh, ruih ve theih tho si, grape wine lo lar ta hluai hi 'wine flu' an lo ti a ni awm a! Hmanniah pawh Krismas leh Kumthar vuakveta a hralh a kal zia an rawn puang uai uai mai.
Kan nunzia han en vang vang hian ruih nuam ti hnam kan lo ni a ni awm e. Kan zu ruih a reh fel hmain kristianna kan ruihpui chiam a, chutah politics kan hmelhriat tan dek dek a, Union leh Zalen pawl feh kawngah pawh kalho hlei thei lo khawpin politics kan ruih chilh leh a. Kan thalai ten ruih atana siam zu leh drugs pangngai bakah dendrite leh silipar thlengin an lo rui bawk a. Ruih theih chi reng reng hi chu ruih zel mai kan tum em ni chu aw, ka ti! Grape wine pawh hi ruih theih hauh loh se heti tak hian kan duh awkawng lovang.
Jun Pio syndrome
Aizawl ka han chuang chhuak ta chu thil hmuhnawm tak tak ka hmu hnem ngei mai! Tlangvalho chuan an sam zuahin an lo ti buk luih hlawm a, kekawr zuih ang tet tawt hain 'gamchha' tial an lo awrh hnalh hnalh mai a. Tamtak phei chu an kal ang zaw zaw a! Nula lam pawh secondhand te nena tangkawpin a Korean thei ang berin an lo induang hlawm a. An nalh hlawm ngei mai; an te deuh va, an mawng a fual deuh mai pawh a!
Hengte hian chhan dang vak an neiin a lang lo. Korean film an phalna la lem lo va Mizo tawnga lehlin, cable TV vela kan lo chhuah tak sup sup vang a ni ber ang. Hemi avang hian Bazarah Korean serial an hralh chur chur a, Korean hla a tlanglawn a, an filmstar ho thlalak hralh a kal em em a, kan nulaten Korean tlangval an atchilh ta bur mai a lo ni.
Hnam changkang zawkte nunphung entawn hian kawng thenkhatah hmasawnna min pe ngei ang tih hi ka ring tlat a. Amaherawhchu keimahni nihna ang ang leh dinhmun ang anga thanlenna nghet leh dik ngaihtuah si lo va, mi an tum reng renga kan khawsak hian eng ram ropui mah kan thlen zu han inring lo ve tlat ia!
The land of Icons/Idols
"Nakin lawkah chuan icon/idol hi an common lutuk tawh dawn a. 'Kei chu icon/idol la ni lo ngat ka nih hi,' tih chu intihtheihnan kan la hmang ang," tiin mi pakhatin a sawi fiamthu ka hre tawh. Mizorama ka chuanchhuah lai vel hi Mizo Idol thlan lai vel a ni a, a hnu lawkah Youth Icon thlan a ni zui leh bawk a. Ka hman phawt chuan ka en ve zel a, he fiamthu awmzia hi ka rin hriat ri riai thei ta!
Talent inthukru haichhuah an han ni te, sum tlem azawng hai luh ve theihna a lo awm te, mipui hriata pho chhuah han nih te hi thil tha ve tak chu a ni. Mipui min han 'entertain' hrim hrim te pawh hi ram chhunga awm reng lo tan phei chuan TV hmaa thutchhan tling a ni ve zel a, a tha viau mai.
Thil pahnih erawh min ngaihtuah tir. Pakhatna: Kan thlanchhuah te hi an khawngaihthlak. Tu'n an hriat lem loh, vawilehkhatah an rawn lar ta hluai mai a. A hmaa an nunphung nen a lo inmil si lo. Standard thara khawsak a lo ngai a, chu chu a hnu zela an sum lakluhin a pha si lo. Sawrkar hna emaw sum hnar dang emaw an hmu a nih ngawt loh chuan he ram hi zai ringawta eizawnna chi a la ni mawlh si lo. Lar chiah kha a hlep a ni zui leh mai thin.
Pahnihna: Mizote hi zaithiam hnam kan lo ni lo, tih ngaihdan ka lo neih thin hi ka nemnghet lehzual. Pangngai taka zai ve thei mai chu a mipui ngaihtuah chuan kan thahnem nangiang mai. Mahse, hun kal tawh chhui kir char char pawhin 'zaithiam' tia han sawi tak tak tur chu mi tlem te chauh ka hmu. Zaipawl te pawh nei tha kan inti viau thin. A dik. Mahse 'Halleluiah Chorus' sakah reng Handel's Young Messiah leh kan zaipawl te sak a inthlau mai!
Idol/Icon kan thlan thinah pawh hian chuti tho. Zai tha viaua kan hriatte pawh a khawimaw laiah an zai lai (sharp/flat) leh tlat thin. Studio-a duhtawka cheibawl chuan a chhuak nalh ve mai. Mahse 'live music' nena mipui hmaa kan han zai chiah hian kan zaithiam lohzia a lo lang leh thin.
A zai thei nazawng hi 'zaithiam' title pe kher tawh lo i la, zaithiam tak takte erawh chawisang leh zual i la, hma kan sawn phah deuh ang e maw chu.
Mizoram boruak ka'n hip leh phata ka thil hmuh leh ngaihtuahna vak vel te ziak vek dawn i la, a sei lutuk ang. Mahni intihhlum lo hluar ta viau mai chungchang te, mobile phone leh sex chungchang te, kan khawtlang nun leh ram hmasawnna chungchanga min helhkamtu thil zawng zawng te hi hmun khata han vawmkhawm sen rual an ni lo. Amah Arnold-a tawngkam hawhin, "I'll be back," i ti phawt mai teh ang.
Khatia riah buk rauh san tawh ang maia he hmun ka tihkhawhar vang vang takna khan chhan fahrah te te chu a nei ve a. Puhmawh tur pakhatna chu UK Border Agency an ni! Reilote chawlh hmang zawk a let leh mai tura inngai kha min rawn hauh lovin dan thar min lo siam hnan pek a. Registration, reference number chuti khati an ti a. Kum dangah a tul ngai miau loh avangin ka thawhna lam te'n chutiang lo nei lawk thlip thlep hek lo, kei ka keleawl a, khuti lam an invai buai ta chiam mai a ni.
Chutiang vel teh nuai avang chuan kal mai thei dinhmuna dingin kal mai si lovin, heti lama inbengbel ngam chiah si lovin ka awkai ta vel a. Kan lo heti ta a ni!
Swine flu leh wine flu
India rama ka let leh hun lai vel kha Swine flu hran vanglai kha a ni a. Zan rei tawh lamah Mumbai Airport kan han thleng chu dawhkana thuho leh hmunphiatho thleng mai khan mask an lo vuah fur mai a. Laboratory lian takah kan lut ta emaw tih mai awl tak a ni. Heathrow lamah chutiang hmuh tur an awm ve si lo va. Kolkata Airport-ah pawh chutianga rawn intuam chu Mizo ka hmu hnem mai. Keini hian Swine flu chu kan lo hlau ber a nih hi, te ka ti rilru mai mai a.
Lengpui Airport-a an lo tih dan hlei hlei khan min ti buai! Doctor leh nurse ho hi dawhkan hungin an lo duty ve a. Hming leh address min ziahtirin boarding pass-ah seal an lo chhu ringawt a, a zo chu a ni mai a. Kha khan eng chen chiahin nge swine flu lakah kan ram a venhim dawn tih tak chu ka zawt hman ta lo.
Mihring himna leh hriselna kawnga inthlahdah em em chung sia eng emaw hleka a hleihluaka kan chiai leh thin si zia te ka ngaihtuah zui a. Hmabak kan la ngah mang e, ka ti!
Total prohibition-in a huam tel ve chiah si loh, ruih ve theih tho si, grape wine lo lar ta hluai hi 'wine flu' an lo ti a ni awm a! Hmanniah pawh Krismas leh Kumthar vuakveta a hralh a kal zia an rawn puang uai uai mai.
Kan nunzia han en vang vang hian ruih nuam ti hnam kan lo ni a ni awm e. Kan zu ruih a reh fel hmain kristianna kan ruihpui chiam a, chutah politics kan hmelhriat tan dek dek a, Union leh Zalen pawl feh kawngah pawh kalho hlei thei lo khawpin politics kan ruih chilh leh a. Kan thalai ten ruih atana siam zu leh drugs pangngai bakah dendrite leh silipar thlengin an lo rui bawk a. Ruih theih chi reng reng hi chu ruih zel mai kan tum em ni chu aw, ka ti! Grape wine pawh hi ruih theih hauh loh se heti tak hian kan duh awkawng lovang.
Jun Pio syndrome
Aizawl ka han chuang chhuak ta chu thil hmuhnawm tak tak ka hmu hnem ngei mai! Tlangvalho chuan an sam zuahin an lo ti buk luih hlawm a, kekawr zuih ang tet tawt hain 'gamchha' tial an lo awrh hnalh hnalh mai a. Tamtak phei chu an kal ang zaw zaw a! Nula lam pawh secondhand te nena tangkawpin a Korean thei ang berin an lo induang hlawm a. An nalh hlawm ngei mai; an te deuh va, an mawng a fual deuh mai pawh a!
Hengte hian chhan dang vak an neiin a lang lo. Korean film an phalna la lem lo va Mizo tawnga lehlin, cable TV vela kan lo chhuah tak sup sup vang a ni ber ang. Hemi avang hian Bazarah Korean serial an hralh chur chur a, Korean hla a tlanglawn a, an filmstar ho thlalak hralh a kal em em a, kan nulaten Korean tlangval an atchilh ta bur mai a lo ni.
Hnam changkang zawkte nunphung entawn hian kawng thenkhatah hmasawnna min pe ngei ang tih hi ka ring tlat a. Amaherawhchu keimahni nihna ang ang leh dinhmun ang anga thanlenna nghet leh dik ngaihtuah si lo va, mi an tum reng renga kan khawsak hian eng ram ropui mah kan thlen zu han inring lo ve tlat ia!
The land of Icons/Idols
"Nakin lawkah chuan icon/idol hi an common lutuk tawh dawn a. 'Kei chu icon/idol la ni lo ngat ka nih hi,' tih chu intihtheihnan kan la hmang ang," tiin mi pakhatin a sawi fiamthu ka hre tawh. Mizorama ka chuanchhuah lai vel hi Mizo Idol thlan lai vel a ni a, a hnu lawkah Youth Icon thlan a ni zui leh bawk a. Ka hman phawt chuan ka en ve zel a, he fiamthu awmzia hi ka rin hriat ri riai thei ta!
Talent inthukru haichhuah an han ni te, sum tlem azawng hai luh ve theihna a lo awm te, mipui hriata pho chhuah han nih te hi thil tha ve tak chu a ni. Mipui min han 'entertain' hrim hrim te pawh hi ram chhunga awm reng lo tan phei chuan TV hmaa thutchhan tling a ni ve zel a, a tha viau mai.
Thil pahnih erawh min ngaihtuah tir. Pakhatna: Kan thlanchhuah te hi an khawngaihthlak. Tu'n an hriat lem loh, vawilehkhatah an rawn lar ta hluai mai a. A hmaa an nunphung nen a lo inmil si lo. Standard thara khawsak a lo ngai a, chu chu a hnu zela an sum lakluhin a pha si lo. Sawrkar hna emaw sum hnar dang emaw an hmu a nih ngawt loh chuan he ram hi zai ringawta eizawnna chi a la ni mawlh si lo. Lar chiah kha a hlep a ni zui leh mai thin.
Pahnihna: Mizote hi zaithiam hnam kan lo ni lo, tih ngaihdan ka lo neih thin hi ka nemnghet lehzual. Pangngai taka zai ve thei mai chu a mipui ngaihtuah chuan kan thahnem nangiang mai. Mahse, hun kal tawh chhui kir char char pawhin 'zaithiam' tia han sawi tak tak tur chu mi tlem te chauh ka hmu. Zaipawl te pawh nei tha kan inti viau thin. A dik. Mahse 'Halleluiah Chorus' sakah reng Handel's Young Messiah leh kan zaipawl te sak a inthlau mai!
Idol/Icon kan thlan thinah pawh hian chuti tho. Zai tha viaua kan hriatte pawh a khawimaw laiah an zai lai (sharp/flat) leh tlat thin. Studio-a duhtawka cheibawl chuan a chhuak nalh ve mai. Mahse 'live music' nena mipui hmaa kan han zai chiah hian kan zaithiam lohzia a lo lang leh thin.
A zai thei nazawng hi 'zaithiam' title pe kher tawh lo i la, zaithiam tak takte erawh chawisang leh zual i la, hma kan sawn phah deuh ang e maw chu.
Mizoram boruak ka'n hip leh phata ka thil hmuh leh ngaihtuahna vak vel te ziak vek dawn i la, a sei lutuk ang. Mahni intihhlum lo hluar ta viau mai chungchang te, mobile phone leh sex chungchang te, kan khawtlang nun leh ram hmasawnna chungchanga min helhkamtu thil zawng zawng te hi hmun khata han vawmkhawm sen rual an ni lo. Amah Arnold-a tawngkam hawhin, "I'll be back," i ti phawt mai teh ang.
20 comments:
Nia, khatia thehmeh ang maia i reh ta vang vang mai kha kan ngaih a tha tawh chiah lo a, a zawng tur leh chanchin ngaihven tur kan lo in tir hman tep a, mahse le him dam takin i lo kir a, thu leh hla lungthlu zet i rawn chhawp chhuak thei hi kan lawm a, Kumthar chibai nen ka lo hmuak a che.
Kumthar Chibai phawt le.
Ka rawn leng lut ve tawp mai o.
I blog chu chhiar a nuam hle mai...
@Varte, nang pawh kumthar chibai le! Keini tehlul avanga in ngaih te a lo tha lo hial chu a inthlahrunawmna leh a lawmawmna a inchen reng mai ka ti!
@Irene, Kumthar chibai. Nia kahriat hi ni tak che maw!:) Engpawhnise i lo leng lut chu ka lawm hle mai. Lo leng fo vang che. In tana thu chhiar tlak pawh kan rawn theh chhuak ve ngut emaw chu le!
Welcome back hotupa! Kolasib i lo kal a, kan intawk lawi vel tih i awm loh hnuah ka hre leh hnuhnawh a, a pawi ka ti khawp mai. MC-i khan i phone no. a lo nei lo zui!! I thuziak ka la chhiar hman chiah lo.. I'll be back :D
Ridetech Challenge lampang kha i la telh lo a nih hi he he...
Ekhai...hotupa kan tlangval thenkhat te inchei dan i rawn sawi khi chu kei pawh sakawrbakcheh nen a han cheh bun sak chak fe fe a sam han siam kual vel chu ka hmu ve nual mai ka ti...eng lem ah nge maw in siam an tum le aw??? te ka lo ti rilru ve mai mai a!
@Zaia, Thanks hotupa! Nia maw le, MC-i'n i number min pe thei tlat si lo va, i lo icon buai vel bawk nen, kan inpelhsawlh kual ta a, pawi khawp mai. Kei pawh Kolasib lamah chuan I'll be back:)
@fel_feltea, Kan la ti chho zel ang chu maw le...
@avena, nia maw le hotupa mi an tum reng reng hian kan la khawsa chu a ni ber a, engtia han tih tur nge maw kan nih dawn ni! I hovin sakawrbakcheh nen kan la thawk chhuak dawn em ni tak le?:)
A ngaihnawm hle mai, ruih nuan ti hnam kan lo ni a ni awm e' tih lai tak khi a dik ka ti lutuk. Chubakah Korean film kan atchilh dan hi an fashion kan entawn a, a tha lutuk, mahse chumi phena thil pawimawh zawk leh ngaihhlut awm zawk an thawhrimna te, an hna a an rinawm na te, an intodelh na te kan hlamchhiah leh si, hetah hi chuan kan in enchian deuh a tha in ka hre ve mai mai . .
Ziak tha hle mai, ka chhiar chhuak vek, thu tak tak i sawi, kei pawhin ka lo ngaihtuah ve fo thin, ka sawi chhuah thiam si loh i rawn sawi a ka lawm e.
@Lalhmangaihi, (ti lawl lawl mai ang:) 'ka rilru ang pu mi' lo ni ve chu a va lawmawm em! Ni e, culture chi hrang a innawk chiah hian hnam changkang zawk (dominant culture) hi a dingchang zawk zel a. Chu chu keini pawh hian kan tuar tih chu a chiang. I sawi ang hian mi tihdan kan lak vak vak a, a tha leh tangkai 'adapt' nachang kan hriat si loh chuan dar ri mai mai ang kan lo ni ang...
@Anonymous, i lo lenglut a, ka thuziak te min hlutsak ve avangin keipawh ka lawm e. Lo lenglut fo teh khai...
Sawi tur i ngah ngawt ang, a dang pawh i la nei teuh ang. Han ti zel teh, a ngaihnawm. A hmuna awm ten ka lo bengkhawn mang loh i rawn sawi ngaihnawm thiam riau mai.
Happy New Year
'2nd hand nen a trang kawpin', tih lai tak khi ka la fuh lutuk a..ka nui char char mai!! Aizawl thralai hi creative deuh a sin an nih le....TV a mi an hmuh ang hi ang ve deuhvin an sawngbawl chhuak ve leh mai zel!!
Thil dang daih, Pathian thu lam an zawh tur che thil pawimawh deuh ka nei a, please in ka email ah hian ( kanidari tih dan deuhvin) min rawn missed call hram teh. pieceofmymind3@gmail.com
thanks,
pi bmw-i
@samuelapa, Kumthar chibai le! Nia, sawi tur hi ngah ve hian ka inhre khawp a! Mahse taimak loh chu thuhran, rilrua awm ang han ziah chhuah zung zung hi ka harsat fo mai. Ngaihnawm i lo ti chu ka va lawm em!
@Pi BWM, nangni te hial in lo lut ve nawlh hi chuan awm te hi a ti nuam thin! Ni e, Aizawl thalai ho hi kawng tam takah an fakawm narawh e... 'A ang' tak hi kan thiam ve zung zung zel a nia...
Remchang hmasaah i mail-ah chuan ka rawn missed call dawn che nia:)
old school leh new school hi kan awm tan mek ni awm tak a ni...!!
a va ngaihnawm ve le kan chiar chhuah dap chu le.
i va dak sei thei teh duah ve mawle... kei ni pafa zin pawh kha, kan kal hma lawk ah kan hritlang a, khawsik ser ser leh khuh bur bur chung in kan chhuak a, thlawhtheihna chhung a han khuh pawp pawp mai chu a inthlahrunawm duh kher mai.. min melh nghal hrek hrek zel mai tawh sia.
Delhi airport ah thermal camera an lo chhawp rup mai.. a nuam miah lo.. mahse kan swine lo a niang chu ka ti mai a.. kan kal tlang ve mai bawk.
@EPISTEMOLOGY, ni e ti raw... Awmze nei lova a thar apiang zuan leh sawt puina tur awm tawh si lo va a hlui vawt tlut tum hi hmasawnna kawnga an hnawksak theih dan pawh a intluk thuak thei awm asin...
@amuana, nangni meuhvin in lo chhiar chhuak dap chu a va lawmawm dangdai ve aw... Thanks!
@ALEXXfender, teh hlawl che chuan:) Nia, hei han luanliam fuh deuh chuan kan inchhak da chiam zel mai a nih hi! Hemi tuma ka haw hi kei pawh ka khuh deuh kherh kherh reng bawk sia, rinhlelh falah kan tang ang tih kha a hlauhawm duh fu ni!
Hotupa re-entry na tam tak i nei tawh ngei ang. Tichuan, Zawlkhawpui lamah i la awm mek em ni ?
Sekibuhchhuak, Zawlkhawpui lamah ka la awm mek e... La awm zawk tak che maw?
Ekhai hotupa.. he ti lamah hian i tam deuh teh ang u. keipawh ka rauh san rei tawh lutuk a, ka inthlahrung lek lek mai nia mawle.. mahse khawnge i han pawng chhuak veleh phawt mai ang aw..)
Post a Comment