Min hrechiangtute reng rengin lam lamah kher hi chuan chim sang vak tur chiah min ngai ngai lo. Party-na leh lamna hmuna loh theih lohva tel a ngaih paw’n a fatu lama tang chi, mite hnawksak tih riau chi ka ni. Kalvari dance lamah pawh ka chuti teh lua lo. Sawi tur ting chuan awmhmun thawhsan meuhva lam hi ka nei ve nual tawh. Mahse ka zei ngang lo! Chutiang mi chu ni mah ila hei pui, ka lam ve leh ta tlat pek mai!
October 18, 2008 a ni a. He ni hi abikin UK-ah chuan lam runpui ni a ni!
‘Big National Ceilidh’ an ti a, hemi zan hian ram chhung hmun hrang hrangah a huhova lamna chi,
ceilidh dance-in mi sang tam tak an lam thup thup mai thin hi a lo nia. Mite tanpuitu pawl pakhat
WaterAid tana sum tuakna a ni nghal a, a luh man pawh £8 lai a ni. Hetiang hunah hian
live Band-in
music an tum rema a huhova lam a ni thin a.
Pair engemawzat kha hlawm hrang hranga in thenin an ding tlar thup mai a. Chutah
‘caller’ an tih mai chuan lam tan hmain lam dan tur a rawn sawi a. Zir chawp a, lam nghal zel kha a ni tawh mai.
Hemi ni ber kher hi ceilidh dance-a tui em em mai Rob-a te nupain chaw eia min sawm ni a ni hlauh mai pek a. A tirah chuan lam thiamho lam min enpui dawn emaw ka ti a. Chaw kan han eikham chu, “In bo lutuk loh nan…” tiin an living roomah chuan lam min zirtir ta chiam mai a! Chutah The Heath Park, Cardiff-a lam tur chuan kan phek chhuak ta a ni. Ka va han huphurh teh reng e aw!
Programme an ruahman dan chuan zan dar 8 atanga dar 11:30 thleng kha lam ngat ngat mai tur a ni dawn a ni! Hall chhung kan han lut chu le, mi zahnih rual vel zet tur hi live music remin an lo lam suau suau mai a. Ka’n thlir vang vang a, ka luh ve loh tawpna turah ka lut a ni, ka ti rilru vang vang tawh mai a. An lam dan lah chu kalphung fel tak nei, pakhatin a tihsual palh chuan buai nuai thei kha a ni reuh leh nghal a. Mahse lam tura kal kha kan ni miau a, ka lam ve ngei chu a ngai dawn lawi si a ni!
Rob-a te nupain an han beih lauh lauh tawh hnuah chuan ka hun a thleng ve ta! Rob-a nupui Diane-i nen chuan lam tual lamah kan inkai lut ve zan zan mai a. A tirah chuan ka che phelh ang reng fu. Luh lohna turah te ka lut a, mi din laiten ka tlum ang zuk zuk a, vir kual hunah te khan a ni lo zawngin ka lo her thul. Ka hmaa nu pakhat mawng te kha ka va pet fuh teuh e! Diane-i pawh khan atirah phei kha chuan lampui harsa min ti ve ngawt ang!
Chutiang zela kan han beih chhoh fe hnuah chuan zan dar 10 a lo ri a. Big National Ceilidh apianga tih ngei ngei, inkai kuala lam hun a ni. Khawi hmun pawh ni se, he hun an hmanna hmunah tawh phawt chuan zan dar 10-ah chiah hian music inang ‘Jamie Allen’ ngei mai chu an play a, lam dan inang ‘Circassian Circle’ an tih chuan an lam kual thup thup thin. Hei kher hi chu a style a mawl bawk a. Nuam ka ti ve ngang mai. ‘Rau’ kha a nei ve tlat a ni! Chau hnepa kan han intheh kual vel hnuah tap dance show kan en leh te te a, kan tin ve ta a ni.
A pui a pang, a lian a te, rual ban leh ban lo te pawh a duh apiang huap, ruih leh buai awm lo, mi rethei zawkte tanpuina ni pah fawm a huatna tel hauh lo va mi zahnih dawn mai han lam ho suau suau mai kha chu a thianghlimin a ropui danglam ve hrim hrim hian ka hria a. Inchhir pawh ka inchhir duh ta lo.
