Ka kawnferen ve
Member 121415 zet nei Kristian Thalai Pawl Inkhawmpui Lian meuh chu a lo ropui phian mai. He inkhawmpuiah hian hun rei tak chu ka kal ve ngai ta lo va, khatia ka'n nan fuh ve tak hlauhah chuan, "Tun tum chu khawnge!" tia insang phekin Mamit lamah ka liam thla ve ta kha a ni a. Zan hnih lek riaka kal ve mai ka ni na a, sawi tur ka hawn hnem ve phian lawi a. Ngaihtuahnaa thil lo awm then khat hmangin ka'n titi mai mai teh ang.
Thank you for the music
Pathianni chawhnua pandal kan lut tur chu Wales atanga lo kal sap pa lian buang theng thung pakhat nen kan titi chiam pek a. A thusawi pakhat ka pawmpui ve riau chu, "Musician in nei tha hle mai, khuang leh rimawi chi hrang hrang nena in tih ang hian ti ve ta i la, thalai tam tak kan huikhawm ve theih ka ring..." tih hi a ni.
Ni e, kan musician ten rimawi hmanraw chi hrang hrang hmanga mipui zai min han rem khan boruak a ti nuam a, thalai lehzual ta sawta inhriatna te pawh min neih tir hial nia! Music lamah theihna kan nei tha a, nasa takin hma kan sawn bawk tih a chiang. A lawmawm ka ti.
Mit la zual pathum
Kan thlen ve hma thil engmah sawi tur ka nei lo va. Ka hmuh chinah thil pathum, ka mit la riau an awm. Pakhatna: Chanmari Bial drama kha. Lemchan lamah khati tak khan kan lo changkang ve tawh ang tih rin ngaihna reng reng ka lo hre lo. A thuchah chu thuhran, a hmuhnawmna leh a tak (real)-naah ringawt pawh Mizo drama chan ka lo hmuh tawhte lakah a chungnung lawr lak. Minit reilote chhunga khatiang lemchan hmuhnawm min entir tur khan hmanraw manah cheng sing hnih chuang an seng ral a, Aizawl atanga 407-a phurh tham bungrua an rawn thawh chhuahpui. Music leh costume te kha a va tha e aw! Drama-ah pawh khati kan nih chuan film tha leh hmuhnawm siam tur paw'n skill kan nei a, bungrua leh hmanraw tha kan neih phawt chuan sang tak kan thleng thei niin ka hmu.
Pahnihna: Electric Veng Bial worship dance kha lam satliah a ni lo. Choreography a ropui a, chu aia ropui zawk chu an ruala tih takzeta Pathian min biak tir thei kha a ni. Hmuhnawm an chhuah a ni satliah lo va, mipui thinlung ril takah Pathian thuchah ropui an puang. Hma kan sawn zel!
Pathumna: Zarkawt Bial nula pangate khan an zaithiamna leh an music thiamna hmang khan mipui min va barakhaih chiang! Band tha kan neihte an khum chu ka ti lo, Mizo nula dik tak, puan bih hnap chunga guitar, keyboard leh chhepchher nena stage-a an rawn che vel khan paho ngaihtuahna a tibuai chu a nih ber kha maw le! Kan nulate hian tlangvalte tih theih zawng zawng an ti thei vek lo a nih pawhin, music lamah hi chuan an ti ve thei tih a chiang reng mai. Hmasawnna bawk!
Min ti nuam lotu thil pali
Pakhatna: Taiwan atangin thalai rualten kan inkhawmpui an rawn chhim ve a. Chibai bukna thute, nuam an tih zia te leh inunauna siam zui zel an duh thute tih takzetin an sawi a, fiamthu an thawh lo. Mahse Chinese tawng hi kan nuih zat zawng tak a lo ni nge ni teh reng ni, mipui kan nui dur dur mai. Kan tawng hi a hre ngai lo tan chuan tawng nalh lo ve tak a ni tih ngaihtuah hauh lo va, mi tawng kan han nuih dur dur mai kha chu kan khawhawi la zauh tawk lohzia ti langtu a ni a, zia lo ka ti deuh.
Pahnihna: Inkhawm banah thingpui an rawn sem a, bucket chhin pawh nei lovah thingpui an rawn khai lut luau luau mai a. A bulah mi an veivak deuh reng bawk si a, vaivut khu nen... a hygiene chiah lo ka ti. Ketli lian a ngaihtuah mai theih loh em ni aw...
Pathumna: Mipui thutna kar a zim tlangpui a, thutphah atana hman thing phek lah a hlai si lo, keini ang bawp chu a leng ngang lo a ni ber. Inkhawm chhung a rei bawk si avangin thut ringawt khan a sil thum theih. A aia nuam zawk hret a siam theih ni tawh se a duhawm hle.
Palina: Vaivut hi! Kan ram ti nuam lo tu ber pakhat chu thal laia vaivut, fur laia chirh diak hi niin ka hria. Engtia han tih tur nge maw ni dawn le aw...
A tlangpui thua thlirin thil hi hman ang ngawt kha chu a lo ni tawh lo tih ka hmu. Hnam changkang zawkte um pha turin kawng thui tak zawh a la ngai tih lang reng mahse thalai rual nungchang leh che vel atang khan, "Hma kan lo sawn ve sawt ta hle mai," ka ti.
20 comments:
Hotupa, i conference hman bik a ni maw! Keichu hei ka hman ta lo; kan awmna ram kan thlakthleng hrih a nih mai hmel e a! :-)
Chinese tawng hi tawng mawi tak niin ka hria. Cantonese te, Thai, Loas te ai ngawt chuan..avan zia love aw, chutia an lo nuih tlat mai le!
Tunge an tawng leh sak a?
I vannei thin mang tak e aw. Zirmi tih takah kalna apiangah hian- mi hmuh ve tho mah nise- ngaihnawm tak hian i rawn in puang chhuak leh tlat thin. A ngaihnawm hle mai. Kal ve phak a chakawm hle mai.
A ngaihnawm hle mai. I sawite pawh hi sawi awm tak vek niin ka hria. I sawichhuah dan pawh keini chhim thal bekang puah ve pawp pawp ang ni lovin, awmze nei takin, fakna leh selnaah pawh nem dam takin i ziak a, chhiar a nuam riau. Hetiang hi ka thiam ve loh zawng a ni. Thil review chi ka ni lo, ka tawngkam hman hi a lo hriam leh thin. Hotupa, i hmuh ang hmu lo hi Conference kal zingah an tam awm mang e!!
Min ti nuam lotu i tih te khi han chhiar zawng pawhin min tinuam lo ve thei a lawm!
I ziak ngaihnawm thiam hle mai.
Chandmari bial drama chu ka van en ve chak..an stage set vel dan te poh hmuh a van chakawm ve le. Photo i lo click keuh lo mi?
Taiwan lam mikhual chu an va khawngihthlak zawk ve. Fiamthu thawh ni si lo an nui dur dur chu ngaiha tha lo duh ngawt ang. Awm ve lo mah ila ka lo zak ve ringawt!!
-BMW
@Sekibuhchhuak, Nia maw le,zan hnih lai ka zu riak thla ve hman a lawm. E heu! UK lamah i awm tihna? Chinese hi nia, mawi deuh asin maw le. Rev. Zaidarhzauvan an tawng chu a leh sak a lawm.
@CHHUNGAPA vannei ka inti khawp mai, kal lohna reng a rei ta mai a. E khai, nangni ang mi thiam chin hi chuan mi kutchhuak nawizel te te pawh hi in chhiar ngaihnawm thei zel a!
@Zaia, hotupa nangni meuhvin min han fak ve leh thin hi chu a lawmawmna leh mahni insitna a inhen thuak mai thin! Thanks!
@keimah, S. Islands atang daih a i lo lenglut chu ka lawm hle mai! Hehe! ni e, kha min tinuam lo ru riau a lawm! Min lo hlutsak a, ka lawm e.
@BMW, Chanmariho drama kha a video chuan ka nei a, ka thutna a fuh chiah loh avangin ka lo klik ta keuh lo a ni. Ni e, hnamdangte bul/zinga awm hi kan inzir deuh chu a la ngai a ang khawp mai.
KTP Gen. Conference Report ka ngaihthlak tawh zawng zawngah hei hian a hlim thla min hmuhtir tam deuh ber. Ziak mi tak i niin ka hria. Ziak chhunzawm zel ang che...
I conference report chu a ngaihnawmin a bengvarthlak kher mai, kal ve ang maiin kan in ngai thei alawm.
Mi tawng nuih dur dur lai part khi a zialo hle tak mai..
HMASAWN kan tih pawh hi eng degree atanga teh nge ni dâwn? PERFECTION hi kan inteh dân atang hi chuan kan tlin chuang dâwn rèng rèng lo; Krista kaltlanga Pa Pathian min thlìr dàn hi a PERFECT tih kawngah i lungawi rih zàwk fe ang u ...
Pharisai-te pawh an meng fìp teh thìn asin!
"An sualnate ka hre reng tawh lo vang," titu Pathian Nung kan nei tlat, kan nihlawh hle.
@Leitlang, ka phu lohvin min fak a, lawm tur nge zah tur tih pawh hriatthiam a har lek lek zawk mai! Engpawhnise i lo lenglut a, ka lawm e.
@Varte, ka lawm leh pek e! Nia, zia lo ka ti deuh kei paw'n...
@chawnghilh, a dik ngawt mai, perfection hi he khawvelah hi chuan tuma'n kan tlin mawlh lo vang. Chutih rual chuan famkimna lam pana thang zel tur kan ni si. Kristaa Pathian min thlir dan a perfect rualin kan thlen chin atanga hmasawn zel turin min fuih tlat a. Chuvang chuan tiamchin lam pana tlan talh talh a, hmasawn zel tura mite fuih hi a ngai si a nih hi maw le! Kan famkim dawn chuang lo tih vanga hmasawn kan tumloh chuan thuthluang theology te pawh kan hnaih thuak mai ang tih a hlauhawm ve bawk a nia!
'Hmasawn' tehna degree chu a context azirin a inang lo thei viauin ka ring. Engpawhnise, i lo leng a, comment awmze nei tak i rawn thawh hi ka lawm takzet e!
Post a ropui a, comment a ropui e. Kei pawh ka kal ve a, mahse, ka Blog-ah pawh hetiang reng reng ziah tur zuk hre ve tlatlo ia.
Kan Pufaka nge nge a chhiar a nuam hle mai.
kan hotute rawn chhawp chhuak ropui leh hle mai a...thlarau lam a malsawmna thar dawn lam pang chu Part_2 ah kan ti deuh nge sawi rik ava awm lo em :)
Hla Phuah Thiam tih takah I Thu ziah pawh a ngaihnawm e. Kal ve ta ila, i thu ziah ang zawng zawng khi chu ka hre ve vek tho chuan ka ring a.. mahse a ziah a zawng chuan ka ziak chhuak thiam ve hauh lovang.Taiwan Thalaite thusawi laia lo nuih dur dur chu a va tihchi loh ve :D
@PimPom, i ti lawmawm e!
@dula, adelfos an tih hi lo zuk ni reng che chuan! Ka sawi ho khi a rau viau emaw ka lo ti asin:)
mesi, a lawmawm thin, nangni meuhvin min han fak ve hi chu! Kal ve ngat la chu i kam liam changin kan ka hau reng ang maw le!
Ilo zuk kal ve tak tak elaw!!! kal ve ka duh teh reng nen insakna bungrua vel lamin hringchar lamah ka liam leh ta vut a ka kal thei ta lo a, i thuziak a ngaihnawm in i zarah kal ve ang riakah ka inngai e
Kal ve tak tak e maw le... in chan ropui khawp mai hotupa! Mahse Inrinnia kal ve mai chauh kha ka nia thil hriat leh hmuh a khingbai khawp mai...
ziak ngaihnawm in a funkim khop mai... lawmna leh lawmlohna inkarah hian thil zawng zawng chu alokim vek anih ber mai hi maw.... kei conference kala kalve miahloa mizoram awm hunah chuan kalve thei tawh mahna....
Coment ngaiha pawh ka hr thiam lo,ka comment lo mai ang
Post a Comment