Monday, November 21, 2011

Mama's Song


Krismas thil thar te chu nei kim vek tawh mah i la, hmabak hlimawm leh nghahhlelhawm tak min la hmuak thin tu chu Urlawk zan a nih thin kha. Khatih lai khan Krismas Pa kha tuna Santa Claus ang hian ka suangtuah ngai paw'n ka hre lo. Rinna kan tih hi 'thil beiseite awm ngeia hriatna' a nih ngai chuan Krismas Pa ka ngaihdan kha rinna chu a ni ve ngei tur a ni. Hmu hauh lo leh a nihna tak hre chiang hauh si lo khan awm ngeia hriatna ka nei ve tlat a, urlawk zana kan thleng dawhah ngei khan a rawn thlak dawn tih ka ringhlel ngai tlat lo.

Krismas Pa kha ka nu nen khan an inkungkaih tha hleah ka ngai ve tawp bawk. A duhzawng leh a chet vel dan tur kha a hrechiang tlat a ni. Urlawk zanah mu hma turin min han ti a, khum lua thleng dawhin ngaihtha takin kan mu ta siai siai thin a nih kha. Ka nu kha nu hausa a ni lo, mahse a fapa tan hian a tlin tawkah ui a nei ngai lo. Chu chu Krismas thawmhnaw thar leh Urlawk zan dawhthlak atang khan a chiang zual thin. Zing han thawh a, kan thleng dawha thil lo tla ten min tihhlim thin zia kha aw! Chu kan hlimna avanga hmangaihtu nu thinlunga lawmna luangliam kha tunah hian hmu thiam ve tan dawnin ka in hria!

Krismas-a rual kan awh bik hlauvin ka pa nen khan an theihtawp tak meuh an chhuah a, kan tan an inkhawl tang tang a. An thawhrim rah kan seng dawn phawt chuan kutruaka awm pawh an thlang mai zawk thin. Chutih laia an tlin bak bak kan phut reng mai thin te khan hmangaihtu nu leh pa lu a lo tihai thin awm mang e ka ti.

Kan lo puitling a, an tana Krismas thilpek chhe te ka pek ve thin avanga ka nu lawm hmel kha ka mitthlaah a la cham reng. Thenrual zingah a sawi bang lo thin kha a ni a! Hei, Krismas a lo hnai leh ta. A tana thil eng emaw tihsak leh ngei ka chak mang e. Mahse a awm tawh tlat si lo!

Chhungkaw kimin Krismas kan han hmang a, kan ri chel chul mai thin te kha a hunlaiin a hlutzia ka lo ngaihtuah ngai lo. Tunah chuan khang hun te kha thawnthu ang mai a lo ni zo ta a, duh eltiang mah i la Krismas thilpek pek tur nu ka nei ta hek lo! Thil pakhat erawh tih ka tum, ka nu, i tan. Kan Krismas tree (a lam pawh i lam thiam thin lo kha a nia)-ah hian i pual liau liauin arsi ka lo khai ang. Krismas Ni-ah van atangin i lo thlir dawn nia.

I tellova Krismas hman hi kumtinin a huphurhawm thar leh thin. Mahse hei hi ka tiam ang che - Pathianin min awmpui ang a, hlim taka kan awm hi i duhthusam a ni reng thin tih hriain, chumi avang tal pawh chuan kan tana nau lo piang hi hlim taka lawm kan lo tum ang.

Hetah Krismas hmangho thei tawh lo mah i la, nakinah, vanah, tuna i awmna hmunah ngei khan Krismas kan hmang ho leh ngei ang tih ka ring tlat a. Chumi hun a lo thlen hma pawhin nangmah thlahlel ngawih ngawih tute hi rauthla talin Krismas min rawn hmanpui thin la kan va ti em!

[He thuziak rawn pian chhuah tirtu chu a hnuaia mi hi a ni e]


Wednesday, May 4, 2011

Damdawi Kha

Naupan laia damdawi kha ka huat em em thinna kha tun thleng hian ka la sim hlei thei lo. Nu ten kan ka an han keu ang chawt chawt a, damdawi min han tulh lui a, tap chungin, mittui nen, hnap tui nen kan lem ta bawrh bawrh mai thin a nih kha! Ni e, naupang mai tan chuan damdawi ei hun kha 'hun khirh tak lo thleng' a ni hawt mai. A tui lo em a lawm maw le!

Cartoon character-a ka lawm em em thin, Dennis the Menace pawh hian chu hun khirh tak chu a lo paltlang ve ngei a nih hi. Damna min pe tu ni si thil hi engati nge a tui loh em em? He zawhna hi naupang zawhna mai a ni lo. Khawvel zawhna a ni.

Kan duh loh zawng leh kan beisei loh zawng taka thil a lo thlen hian kan thatna tur a ni tih pawm thiam a har thin a. A tui lo va, lem a har a, a kha vawng vawng thin. Amaherawhchu damlo tana damna hi damdawi tui leh thlum ringawt a lo ni hauh lo. Paulan 'ka inngaihhlut lutuk loh nan tisaah hling mi pe a ni' a tih kha 'ka tana tha tur a nih avangin damdawi kha min ei tir' a tihna pawh a ni.

Khawvel mi hlawhtling leh rawngbawltu ropui tak tak te hi hun khirh leh harsa paltlang fo tawh, kawng bumboh sikul chhuak an lo ni fur mai tih kan hria. Psychologist ho pawh hian harsatna leh tihsual atanga mihringin thil kan lo zir nasat zia hrechiangin 'learning by trial and error theory' te pawh an duang chhuak a ni. He theory an duan chhuah hma hun rei tawh takah khan Sam ziaktu chuan "I thuruatte ka zir theih nana tihhrehawma ka lo awm kha ka tan a tha a ni," a lo ti daih tawh.

Kan tui tih zawng tak leh a thlum dep dep nazawng hi kan taksa hian a lo thatpui hauh lo va. Kan duhthusam, kan tana tha tur nia kan ngaih, a tira kan rilrem zawng takte hi a tawpa harsatna min siamtu an ni letling thei fo. Chutiang bawkin kan nuna harsatna lo thleng reng reng hmelma ep a ep ngawt hi a lo dik hauh lo. Nun dan tha zawk min kawhhmuhtu, hringnun hrual fiptu zirtirtu tha an ni thei si a.

Rinna kawngah pawh hian kan ngaihdana kawng tluang zawh a, kan duhthusam rama chen reng kan tum hian kan dai pelh fo. Engkim hre tu, kan thatna tura kawng tinrenga min thawhsak thintu Pathian kutah innghat ngam a, "I thu ni se," tih mai hi tawngtai dan dik leh finthlak a va ni em!

Harsatna te hi kan mamawh thil tam tak kan zir chhuahna sikul tha an ni a, damna tha zawk chang turin damdawi kha kan ei a ngai fo thin, tih hi zirlai harsa tak ni mahse hringnun tana thil pawimawh ber te zinga mi a ni si a nih hi!

Friday, November 12, 2010

Excuse me!

Khati khan khawthlang lam hrutin Tripura ramri Zomuantlang thlengin ka'n phek thla ve ngial kha a ni a. In lamah chawl hahdamin hun awl remchangah blog te pawh ka vil chho ve keuh keuh ang chu tia ka inkhap ka inkhap chhung hian ni engzat nge ral ta chu le? Blog-a ka thuziah hnuhnun ber hi April ni 9 kha a ni a, khata tang khan thla sarih zet a liam ta a. Engmah ka dah belh lo. Thiante min fuihna aw paw'n min au harh hlei thei lo a ni ber a. Laiking puantah tur ang maiin chawngthu pa tih takah 'lung' hi kan chawi kan chawi mai chu a nih hi!

Mahse he tribal hnar per thlir thler hnuaiah hian phatna zawng a lo bo bik hauh lo mai. Hmanah kan thian pakhat, englai pawh a insawi buai em em reng mai hi a awm a, buaina tur em em a neih kan hre lem hlei lo. Chutiangte chu min chan zovang tih hlau thawng ru ang reng tak chungin 'ka buai thu' hi chhuanlama hman tulin ka hre ta mauh pek a nih chu.

Ram pawn lama ka awm lai khan nitin hna pangngai thawh bak chu mahnia awm keuh keuh a, duhzawng tih melh melhna hun kha ka lo ngah phian hi a lo ni a. Chuvang chuan blog lamah pawh ka kut a hlei thei deuh a lo ni. Chutah Mizoramah ka'n chuang chhuak ta a le, nitin hna bakah, kohhran, chhiatni-thatni, thenrual kawm leh sawi fak theih si loh eng eng emaw avangin hun awl ka nei thei ta hlek lo mai a. Han tin ve uaih uaih thin mah i la, thatchhiat chhuanlam eng emaw tak hi a lo awm ve leh khauh zel a. Tum hram i la chu kan thai ve nual tur hi chu a ni na a, ka tlin ta ngang thin lo a ni.

Kan Mizo society hi rualpawl mi leh kohhran, khawtlang, etc. a in hmang mi deuh tan chuan thil ngaihtuah chet chetna hun leh mahnia inkhunghranna hun thawl a lo vang khawp mai hi a lo nia. A huhova thiltih a tam a, kan kal ve ngeina tur chi leh kan tih ve ngei tur chi hi a lo tam bik hle a ni tih te ka ngaihtuah thar leh a. Hei vang hi em ni, school/college kal kan uar ang hua 'mithiam' han tih tak tak tur kan chhuah tlem leh tlat thin, tih te hi ka ngaihtuah thleng leh ta zel a ni.

Hna vawn nei tawh leh eizawnna lama in sawhnghet tawh te tan chuan kan hna tibuai lo va mi tangkai nih hi thil tha a ni a. Chutiang ni ve lem lo tan erawh a inham hnawk lutuk lo zawnga chet lak thiam a tul mang e, te ka ti ta zel a. Ram pawn lama awm te pawh Mizoram ang deuhva pawl hrang hrang neia chetvelna siam tam lutuk te hi a awm thei ang em, tih te ka ngaihtuah thleng ta zel a. A huau huau leh a hup hup lo zawng deuhva inher rem a, fianriala thil tangkai ngaihtuah kawnga harh tharna te hi kan mamawh ta fu a ni thei ang em, tih te thlengin ka ngaihtuah ve ta vak vak a nih chu!

Chung te avang chuan blog lam buaipui hman lo khawpa thil tul zawk dang ka khurbinpui ta deuh te pawh hi ka inthiam chawp ve ang nawk nawk a. Rual pawl hman lo leka bur chut chut reng mai hi tha ka tih ber loh rualin rual pawl lutukna lama thil tangkai zawk tih thulhphah erawh tha ka ti chuang hauh si lo. Kan khawtlang nun inzawm tawnna hlu tak leh thil kan la tihho dial dial theihna te, kan inkawmngeihna te hnawl fithla zawnga tan latu nih erawh chu ka tum lo ve tlat lawi a! Ka va buh teh nuai e!

Excuse me!

  © Blogger template 'Ultimatum' by Ourblogtemplates.com 2008

Back to TOP