Hman leh tun
Swansea khawpui hmun pakhata traffic light avanga kan din lai tak chuan kawng thlang lam chu ka zu hawi thla a. He in hian min lo ep at mai a. Ka'n en chian nak chuan Biak In emaw ka tih kha a lo ni hauh lo. Islamic centre pakhat a ni.
He In hi kristianten Pathian an biakna hmun a ni thin. Pathianniah te chuan mipui thahnem tak an lo kal khawm a, Pathian thu leh hlain an inpawlho thin. Hmanah chuan.
Wales ram hi reporter pakhatin, "Wales ramah Diabola hnuhma engmah ka hmu lo" a tih hial khawpa harhna nasa takin a tuam ram, Rome ho hunlai atanga kristian ram lo ni tan tawh, kohhran chakna ram, miten Pathian thu an lak urhsun em em thinna ram a ni. Hmanah chuan.
Hun a lo kal zel a, hmasawnna leh changkanna a sang tial tial a, nawmsakna leh awlsamna a nasa tial tial a, mite thlarau nun erawh a rawp tial tial thung a. Kristianna hnuhma hmuh tur a tlem tial tial a, kristian an nih leh nih loh pawh inhre chiang lo an pung tulh tulh thung. Tunah chuan.
Hun a lo kal zel a, hmasawnna leh changkanna a sang tial tial a, nawmsakna leh awlsamna a nasa tial tial a, mite thlarau nun erawh a rawp tial tial thung a. Kristianna hnuhma hmuh tur a tlem tial tial a, kristian an nih leh nih loh pawh inhre chiang lo an pung tulh tulh thung. Tunah chuan.
Hengte hian nasa takin kohhran a khawih a. Mahni Biak In pawh enkawl zo tawh lo khawpa kohhran a awngrawp meuh chuan hetiang hian Mosolman unaute kutah kan Biak In te chu loh theih lohva hralh a lo ngai ta a ni. Biak In an khar zawih zawih a, sakhaw dang mite kutah a han awm ta mai te, Biak In tha pui pui sumdawnna hmun, apartment leh vantlang hmuna an lo chang ta mai te mita hmuh fo chuan rilru hi a na ve vawng vawng thin.
'Tun' hi 'hman' a lo nih hunah Mizoram kristianna hian engnge a an ve ang, tih hi ka ngaihtuahna luah tu a ni ta fo a. Star TV kan nei tan dek dek tiha School naupang thenkhatin Setana biak an han zir tan nghal ringawt mai te, information technology lamah kan mit a keu tan dek dek chauh tiha zahmawh thlalak siam leh thehdarh kawnga kan han hmanhlel nghal viau mai te, midang ang bawka sum leh pai uma kan han inpal thlu nawk nawk mai te hian ngaih an ti tha chiah lo a. Khawthlang kristianna paw'n a nep zawh loh heng khawvel hmasawnna te hian engtiang takin nge min la sawp chhoh zel dawn, tih te hi ka helhkam ta riau mai!
23 comments:
Mi sawi kan lo hre ve fo a, a hmun a awm ngeiin in soi chu a chiang bik ngei mai.
Mizote Pathian thuah kan ngheh hi a ngai hle; naupang pakhat mumang mai mai pawhin kan ram a ti su thle dual dual thei si.
He chanchin hi sawi chu ka hre nual tawh a, mahse experience ngei a tawng ziak chhiar chu a den dan a danglam deuh. Kan muslim unau te hian biak in lei lamah hian tan an la nasa a, an tan chuan ram zauhna kawng tha tak a nih avangin sum pawh an ui lo thin. Ngaihtuahna a ti thui khawp mai
@codeAries, i lo lenglut a, a lawmawm e. Thil inang hauh si lovin a mihring ngai tho min chhem nghin dual dual theih dan han ngaihtuah hian i rawn sawi nghehna hi kan mamawh chu a ni tih a chiang ngawt mai.
@vana, ni e, Muslim hovin khawvela ram an lak chak dan hi ngaihtuah tham a awm a ni. Kar tin hian khawvel ram hrang hrang chanchin (country profile) kan zirho thin a, chuta lang chiang tak chu muslim ho than chak zia hi a ni. Khawvel hi a la awm zel a nih phei chuan khawvel awptu hi an la ni lo vang tih pawh a sawi theih loh ve a...
Ngaihtuahna a va tithui em hotupa, he ram chanchin hi ka chhiar ve fo thin a, Pu Sangkhuma ziak te pawh kha ka lo chhiar thin a, rilru a na duh thin ngawt mai. Europe ram hrim hrim hi an inrelbawl dan leh an khawpui an en mai pawh hian Kristian ram tih loh rual a ni lo va. Biak In ropui tak tak kum sang khat dawn dawn a upa te han hmuh te hian lung zu tileng tlat pek a. Chutih laiin Biak In lian leh ropui tak taka inkhawm erawh hmuh tur an thlem hle thung si.
Kan awmna lamah pawh hian Biak In pakhat khawpui laili lai taka awm chu Historical museum atana hman a ni a, hmanah chuan Lal Isua fakin an zaikhawm mup mup thin ngei ang.
Kan Zoram pawh hi hetiang deuh hian thangtharten an la rawn tih a ngai ve ang tih a hlauhawm khawp mai. Chanchintha avanga khawvel eng kan hmuh ve theihna lam hi kan theihnghilh mai hi a hlauhawm thin.
Inthlahrung tak chungin koment leh lok. Individualism lamah hian kan kal nasa luttuk a, church leh society ah responsibility kan thlah thin. Europe bik hi developed countries euh vek an nih tawh avangin mi cheng te pawh an hausa, mahni mum2 in an mum a, tin Pathian an mamawhna a tlem tial tial a ni e.
Hotupa, i helhkham hi helhkham tur dik tak niin a lang. I last para hian ngaihtuahna a beng harh tha khawp mai. An sawi angin, a hmun ngei atanga i han ziah hian a chiang bik a, a mi den a na bik tlat..
@Puia, ni e hotupa, rilru hi a na thin a, han tih theih vak lah kan nei der si lo. Tuna a puitling tawh ho hi chu an nih nih an i zo tawh a, naupangho atang tal hian hmalak dan chak zawk awm thei se a tha ngawt ang maw le... Kan ram pawh hi eng tak ang zel ang i maw?
@vana, e khai inthlahrung lo ve a. I rawn sawi hi point pawimawh lutuk a ni. Hmannia Anglican Asst. bishop nena kan inkawmnaah chuan sakhuana hi corporate zawng ni lovin 'individualistic' zawngin kan kalpui nasa ta a, lang theia Biak In-a tihho dur dur lam aiin mahnia Pathian biak hi tamtakin an thlang ta a ni, a ti ve hlauh mai! Ni e, tamtakin vanram an suangtuahna hi a takin an chen tawh miau mai si a le!
@Zaia, ni e, kan ram kristianna chanchin han sawi hian, 'Keini pawh chutiang chu kan ni thin' an ti fo mai a, ka ngaih hi a ngam ta lo riau thin a lawm maw le! Kan tawngtai zel phawt a ni ang chu.
Hotupa, an sawi ang khian, hei chuan ngaihtuahna atithui vawng vawng hle mai! Kan ram pawh hi hetianga kan kal zel chuan, tuna kan biakin tha tak tak te hi, engngemaw hall leh thildangah kan la hmang zawk mai ang tihte pawh hi a hlauhawm thin !
Wales a mi te pawh hian, hmanah chuan an biakin te hi Muslim te an la hman sak ang a, tih hi an ngaihtuahna-ah pawh an suang tuah ngai bik awm si lo va !
Tunlai mila Pathian thu in hrilh hi thil tih chi tak a nih ka ring tlat. Thuhriltu te pawh Upa lam ai chuan pavalai deuh te thusawi hian min hneh thei zawk daih nia...
I sawi dik lutuk. Changkanna hian kan nunah a thalo zawngin hmun a chang a, a fuh lo zo ta vek a nih hi. Heti lam zawng hi chuan tun hi hman a nih hun tur chu ngaihtuah rikngawt pawh a ngam awm loh a lawm mawle. Changkanna te hi kan sakhaw thehdarh nan hian hmang ve ta ila a tha tur a nia..
@Sekibuhchhuak, a nia sin hotupa, hetiang em chu kan thlen ve loh beiseina chu awm bawk mahse, ngaih hi a ngam zan thin lo!
@fel_feltea, ni e, 'contextualization' hi thil pawimawh tak a ni lehzual ta a nih hi.
@Geminiboyz, a dik khawp mai. Hmasawnna leh changkanna te hi do ngawt chi an ni lo va, do hneh chi lah a ni hek lo. Hman tangkai dan kan thiam poh leh positive impact kan hmu tam mai dawn niin a lang.
Hemi chungchang hi hman deuh khan "BiakIn pahnih" tih ka ziak ve a. Ka ngaihdan chuan, Mizoram hi Global culture lian zawkin min nuai hun chuan, Kohhran hi institution levelah a tla hniam dawn si a...ka lo lungai lawk fu thin. Chuvangin, ka thawhlawm reng reng hi 80% chu missionary chawmnan hman hi ka tih dan a ni.
Ngaihtuahna a ti thui hle mai!! vawi khat Rotary international huai hawt in youth exchange an buatsaih a, USA a mi nula pahnih hi coimbatore ah club member pakhat in a kum khat cheng tur in an rawn kal a, chuan kan thianpa hian an vaiin chaw ei pui ah a sawm a, eng "denomination" nge in nih ? tiin ka zawt a ..."atheist" an inti ve ve a..mak ka ti hmel ka lo meng phawk deuh emaw ni ..enge a mak vak na..pathian awm kan ring lo ani ve mai alawm an ti awl sam et a!!
youniq hi kal zel teh se.Thiana, i thil ziak ka chhiar mek lai hian 'tihdanglamin ka awm' te ti ta ila, keimahah chuan ngaihdan i siam thiam maiin ka ring. I thuziak chhiar e ti lo chuan Mauruangi thawnthu ka rilruah a lo lut daih a!!! "Hmanah chuan, hmanah chuan..... , tunah chuan, tunah chuan.......nau ka awi......". A tawpah chuan ngunhnam hriam leh bil khan decision kha a siam ta mai kha a ni a. Chung em thleng lo tura- Gandhian non-violence paih hauh lova tan lak chu a ngai khawp mai a. Mit ngeia hmu ang maiin i rawn ziah apiangah hi chuan min hruai lut duak duak zel mai zawng a ni. Mahse i thu ziak ka chhiar laia 'NEW INSPIRATION' ka dawng erawh ka in thiamlo khawp mai. Tang zel teh.
Muslim ho hi mak ka tih ve angreng chu sakhaw dang biak in (temple, church, etc) anmahni pathian biak nana an hmang leh thei hi a ni.
@faka, a pawi hle mai... Dawrpui biak in bulah khan 'Gospel for Wales' tih emawni kha a awm tiraw? Min ti hre chhuak zawk alawm.
@EPISTEMOLOGY, nangni ang thil thlir thui mi te in lo lungngai lawk viau hi a mawh lo ve, kan sukthlek leh khawthlang kohhran history han thlir hian ngaih a tha mawlh lo a ni. Hemi laka inveng tur hian tih theih eng emaw chu kan nei ngei tur a ni. Ngaihtuah a ngai...
@avena, ni e, kan awmna bial Rhondda Rugby Club team song chu, 'Guide me O thou great Jehovah' tih kha a ni a, Wales Rugby Union team song chu 'Calon lan' (Khawvel sum tinreng leh lunghlu) kha a ni bawk. Heti khawpa kristiannain hnuhma a lo neih tawhna hmunah hian sakhaw vawn mumal pawh nei mang lo an tam ta em em te hi a mak asin!
@CHHUNGAPA, e khai kan hotute berin kal zel rawh se, in tih chuan a kal zel tur a ni ang! Nangni mithiam in han chet meuh chuan Mizo-Indian context atangin in rawn khawrh chhuak a, a ril ruih zel mai hei. I fakna thute hian min va ti phur thin em!
@Tetea, an hetih vang hian ram pawh an lak chak phah te pawh a ni thei ang a... 'Gospel for Wales' chu ka hre tawh tak. Kan vei si a, kan vei ang hian vei ngaiah an inngai mang si lo va, crusade neih te kan han rawt uaih uaih a, tih chi a ni ve der si lo. A ngaihna tak pawh hriatthiam a har e!
Music hmangin a tih chi lawm maw ni le... Gospel Rock concert te han ti hluai mai ula...
mosolman, juda leh kristian ho hi chu tiang lamah hian kan van han in el tak. Midang rinna da te pawh hi kan vei khawp mai. Abrahamic religion ho kan dang ve na a nia :-)
Hemi in elna a awm vang hian kan tran nasat leh zual pawh a ngai leh zual. Missionary te pawh ni lo mah i la, kan nunchang leh mizia te hi kan thiante kristian nilo ten an lo ngaihsan theih nana kan awm hi a pawimawh.
a poimoh khop mai... Kan Pathian biak in Islamic Centre a an hmang tak khian rilru ava khoih em...
@fel_feltea, eng tak ang ang maw le. Heng te pawh hi anni tan chuan hiptu tha tak a ni lo mai thei ve bawk a ni. Huau huau na tur thil hi an ngah em mai a...
@illusionaire, ni e tiraw. Hetiang inelna karah hi chuan fing taka awmdan fimkhur ve hi a ngai khawp mai. 'Mission' hi mite tih pianthar leh boundary va cross ni ringawt lovin, awmna hmun apianga nuna lantir te hi a ni si a...
@Rinawma, i lo lenglut a, ka lawm e. Ni e, rilru a khawih a, tih theih lah kan nei tlem si a nih hi maw!
Research beih phawt a ngai a nih chu. An mahni hip tu ber kha a tha zawnga kal pui tum a ngai a nih chu.
CHANGE kan sawi ri fo a, tuna kan dinhmun engkim hi Change kan duh tak tak em? tih zawhna min siam ta tlat mai le...
@fel_feltea, ni e, ngunthluk zawka ngaihtuah ngai thil a ni e.
@samuelapa, a dik khawp mai. Eng chen chiaha nasain nge change hi kan inhuam, tih hi zawhna pawimawh tak, ngaihtuah zui tlak a ni e.
Post a Comment