Taxi Driver Ka Khawih!

Kum sangkhat zakua sawmkua pasarih kha a ni ta awm e. Calcutta Mizoram House (Ballygunge) atangin ka thianpa nen kan haw dun a. Zan a rei deuh tawh a, lirthei vei vak a tlem pharh tawh a, taxi ho pawh meter hmang lovin biak rem chawp an ngai tawh a. Eng emaw chen kan han in dawr hnu chuan kan kalna tur a hnai bawk a, Rs. 20/-in kan inbe rem a. Tichuan, kan kal ta a ni.

Kan hostel gate bulah chuan kan han din tir a, Rs. 20/- chu pek kan han tum a, mahse Rs. 30/- a phut ta tlat mai a ni. Keini’n kan inbiak remna aia sang pek kan tum si lo va, buaina a chhuak chu a ni titih ta reng mai a. Kan thawm hria hian taxi veivak thenkhat chu an rawn ding nual tawh a. Inhnial rei vak ngaihna a awm lo, kan tawng thiam pawhin a daih tawh hek lo, ka thinrim insum zo lo chuan motor chhunga awm driver chu ka va tham ta mai a nih chu! Chutah boruak a sosang ta, driver a rawn chhuak, kan indin chilh, taxi ho an rawn pung zel, buaina lian tham rim a nam ta tlat!

Kan hostel gate lah chu a inkalh bur mai si, tlanchhiatna kawng a kaw tawh lo a ni ber mai.Chutah ka thianpa chuan, “I pe mai ang kan chan a chhe zawk dawn tlat mai,” a rawn ti a, pawisa chu a pe ta a, pungkhawmho pawh an kal kiang ve leh ta a ni. Tuma hriat loh vin kan arte thih tep chu a ni e.

Vai rama awm hian awmdan tur chin hriat a har chang a awm fo thin. Kan zia leh rilru put hmang a inang lo va, kan khawsak dan phung pawh a inang hek lo. Anni chu, an nupuite pawnfen phen atang pawh hian an inhau chawhma thak peih e, an tia lawm! Mizo tlangval chuan inhnial hrep lam hi kan thiam ve lem lo va, kan thinrim tawpah “action speaks louder than words” tih kha apply kan duh ta mai thin a ni. Mi tha lo tawn fuh chang hian mahni dikna humhim tuma chet han thawh mai duhna a lo awm thuai thin a. Fair lo taka kan chunga an chet te hian thuin a daih loh chang a lo awm a, kuttuma inhnialna chhunzawm mai duhna hi Mizo tlangval rilruah a awm duh viau. Amaherawhchu hetah tak hian kan fimkhurna tur leh ngun taka ngaihtuah ngai a awm a ni.

Heti zawng hian i’n ngaihtuah chhin teh ang. Bengali tlangval pakhat hian taxi driver ka tih ang chiah hian Mizo taxi driver han ti ta se... A sawhkhawk tur chu kan hre vek. India rama cheng tam zawkte hi hnam upa leh nghet tak takte an ni hlawm a. Tuanlehmang ata tawh culture nghet leh hausa tak neiin hetah hian an lo khawsa tawh a ni. Westernization-in a khawih danglam viau tawh nachungin an culture leh khawsak phungah chuan an la ‘western’ lo hle a ni.

Mi heti zozai zinga keini Mizo uihum zat lek lo awm ve te hi an ngaihah kan ropui tehchiam lo vang tihte hi hria i la. Mi rama kan awm hian ‘mikhual’ zawk kan nih angin a tul hunah chuan inthlahrun thiam te pawh i zir zawk ang u hmiang. A mikhual zawk na na na chuan kan mikhualna te awmdan leh khawsak phungte zira chumi mila insiamrem te hi kan mawhphurhna a ni zawk ngei ang. Chuvangin kan tawngkam, kan chetzia, kan awmdan tinrengah a ram mite tana ‘friendly’ taka awm tum i la, mikhual hnawk sak ni lo vin, mikhual tangkai leh ngainatawm nih i tum zawk ang u, ka han ti ve ani.