Ka Bo!

He khawvel ram zauvah hian mi tam tak an lo bo vin an lo vakvai tawh a. Mahse ka bo ang reng renga bo hi an awm pawhin ka la hre lo. Ka bo thu ka sawi dawn a, pui i tih viau loh chuan ho i ti ngawt ang!

Thlasik hnukhawi lam a ni a, khua pawh a la vawt viau a. A tuk zingah bike-a Lawngtlai pan tur ka nih avangin ken tur ang angte chu ka bag-ah chuan ka hnawh a. Suangtuahnain ka thil hawn tur, theihnghilh chi miah loh check list ka siam zung zung a. Ken tura ka tih zawng zawng chu a kim thawkhat ta. Ka inpeih.

Ka bike
Hetiang bike hi a hmain TV-a an fakna ka lo hmu tawh a. Mei alh kara a rawn khawh chhuak vel leh nula hovin ngaisang em ema an lo melh no vel ka hmuhte khan awhna bawihah min hruai lut a. A zuartupa Pu Maengan ‘bike of the year’ a nih thu min hrilh leh thianpa Peka’n ‘tuaingawt pa a ang’ a tih te chuan ka phurna a ti sang zual sauh va. Tichuan he bike, Suzuki Fiero sen ngei mai hi ka lei ta a ni.

He bike hian Aizawl leh Lawngtlai inkar hi vawi hnih/thum lai chu min phur tawn tawh a. Hnahthial tlangval ho nena ‘highway race’ kan neih tum paw’n min dah chungnung hle. Ani nen hian Saizawh kawng khawk rawk leh Chawngtelui kawng bung vut mai, diak leh nal em em te pawh vawiduai lo kan lo zawh dun tawh a. Bangladesh ramri hnaiha awm Tuichawngtlangah phei chuan an khuaa bike khalh lut hmasa ber record siamin chawimawina ropui min lo khum tir tawh nghe nghe a ni. Chutiang chu a ni, ka bike chu.

Ramhuai speed
Chhungte, thiante leh ka mi phurh tawhte reng rengin ‘khalh chak lutuk’ an tih luai luai khawpa tlan muang thiam miah lo chi hi ka ni ve a. Chawnhu pa Pu Nema’n paho nilum ai naa a report leh danin Kawnpui leh Kolasib inkar kan han tlan tak tak mai chu meizial zuk kha a kawi ngawl ngawl mai a, lei kan rap zeuh zeuh a ni awm e! Kan thianpa pakhat phei chuan hei ngei hi i thihna tur a ni, a ti! Ramhuai speed an tih fo hi a tehna atangin engtia chak nge tih ka hre chiah lo va. Naupan laia ramhuai speed nia kan ngaih ang vel kha chuan tun tumah pawh hian ka tlanin ka hria!

Zai a lang
Mak ve ang reng deuh chu, hetia karkawnga mahnia ka tlan apiang hian zai chakna thlarau ka chang ta tlat thin hi a ni. Thingsul pelh kawng zau leh nuam tak maia ka tlan lai te chuan hla chi hrang hrang, ‘Rotuiburi,’ ‘Ka kulhpui i ni,’ ‘Ba Ba Black Sheep,’ ‘Thlemnaah lut suh la,’ ‘Nothing else matter,’ ‘Nge maw’ tih te leh hla intu lo tak tak an rawn lang zut zut a. NGTV hla ka hriat ang ang te pawh ka thlawh phei nual. Midang an awm lem lo bawk a, a rawn lang hmasa sa chu ka sa phei pawp pawp zel a.

Tuma hriat lohva duhtawka han ‘solo’ vel chu nuam ve ang reng deuh chu a ni. A chang leh ka’n sa tlawk lui vel a, achang leh ‘opera’ style te’n ka ti thul, ka aw ka control kikawi nasa khawp mai! Hnahthial thlen dawnah erawh chuan kawng kawi ka han chhuak thut chu nulaho thing phur hi kawng sirah an lo thu thap a, ‘Nge maw’ tih hla ka sak lai tak kha a ni a, ‘va mak iem…’ tih lai vel kha. An nuih a za ngang mai. Ka hmel an chhinchhiah hman hlauin ka tlan pel puat a.

Zan thiang reh
Zobawk ka thlen chuan a tlai hle tawh a, mahse darkar khat vel chu ka chawl leh tho va. Lawngtlai lam pana kala a lunglenthlak lai ber nia ka hriat chu Hrangchalkawn atanga han liam phei vung vung lai tak hi a ni. Kawng a lo huh chap a, chhim lamah ruah a sur a lo ni. Tawipuia ka chawlhna thin Tebawihi hotelah chuan chhaw chhawih khawpin chaw ka ei a. Thingfal lam ka pan leh ta a ni. Khua a thim chhah hle tawh a, a lang thei chin han thlir pawhin de zeuh pawh hmuh tur a awm lo.

Ngaw dur khup karah chuan ka bike chu a tlan rum vung vung a, ri dang reng reng hriat tur a awm hek lo. Zai bawk a lo lang leh a, mahse ka hla hriat ang ang ka lo sak deuh vek tawh avangin ka hul ta riau mai. ‘Aw zan thianghlim’ ka’n ti uk a, krismas a liam tawh bawk si, ‘Emau kawng dai reh’ tih te pawh a lo lang… ka tui thei tak tak tlat lo. Ka tih ngaihna hre lo chuan ka’n ‘Hey tonight’ ta chiam mai a, ka sa thui thei chuang lo. “Gonna be a sa a na a be there all night long…” te kha ka ti ta velin ka hria! Zun zungin rei vaklo ka chawl leh zawk a. Zun pah chuan ring tawkin “A va reh ve maw le!” ka’n ti vak ringawt a. A reh loh phah lem hlei lo va!

Mi bo ka lo ni!
Thingfal ka tlan pelh hnu lawkah chuan thawk leh khatah leimin nasa tak mai hi ka hmu ta phut mai a. Ka ding chawt a, ka tawlhthlu tep nghe nghe a ni. Kal tlang rual a ni lo. Khuaah chuan ka let leh a, Upa Khennawla te inah zan ka riak ta ringawt mai a ni.

Lawngtlai lam atanga motor chhuak tur zawng zawng an chhuak fel tawh a, Aizawl lam atanga haw tur lah an haw kim tawh bawk si. Lei min thu hria reng reng an awm lo. Lawngtlaia ka quarters-ah chuan ka nau Puia chiah a awm a. Zan dar 12 hnu lamah pawh ka thlen tak si loh avangin a mang a ang ta hle a. Zobawk lam a va phone-in tlai dar 4:30 vela Zobawk ka chhuahsan thu an lo hrilh. Lunglei lama kan hotute leh ka thlenna thin zawng zawng an phone kim tawh. Ka chanchin hria reng reng an awm si lo. Ka dinhmun hrilh turin Thingfalah phone a awm si lo. Tichuan Zobawk leh Lawngtlai inkarah chuan ka bo ta a ni.

Aizawl, Kolasib leh Kawnpui lama ka chhungte zawng zawng an mangang. A then an tap, a thenin min zawn dan tur an rel… Lawngtlai lamah pawh thenrual thate an inhmu khawm a. Tuamna tur puan nena inring sain min zawng turin an thawk chhuak ta bawk. Lei minna hmun an thlen chuan kal zel ngaihna a awm ta lo. Lei minin min dang a nih ringin, ngaih tha lo tak chung siin an haw leh ta hi a lo ni a. Chutia keimah avanga manganna nasa tak a thlen mek lai chuan ka chau tawngkhawng tawh bawk nen, tui em emin ka lo hnar biah biah thung a!

A tuk zingkara min zawngtute an lo thlen chuan tui takin ka lo la mu a. Min kaitho va, chanchin an han sawi chu thawhphan pawh a awm lo, harh chiang tak ka ni! In kan han thleng a, chanchin ngaihvenin thenrual thate an lo awm khawm a. Chuta kawngkapuia ka lut tur ka zah zia mai chu sawi hian a siak lo. Mipui sang chuang hmaah pawh ka lo ding ve tawh a. Chu ai pawh chuan he mi tum hian ka zam zawk deuh chuan ka hria!