Kum sawm chuang teh meuh chu lirthei ke pahnih nei chi hi ka khalh ve a. Ke pahnih chauh nei, vawn loh hleka tluk tum reng mai na na na chu fimkhur reng sen a lo ni lo va. Chetsual khut khut chang a awm fo mai.
Lawngtlaia ka awm lai kha a ni a. Ka hna nena inkaihhnawih thil pawimawhah Sangau ka kal a. One Ton-a puitling hlir mi sawmthum chuang inekbenga kan insawh fe hnuah Saiha ka let leh thei hram a. Saiha atang chuan a tukah Lawngtlai pa pakhat nen bike-in kan inphur liam zui leh nghal a. Lawngtlai lama haw pahin Tuipang kan tlawh kawi a. Kan tluang par par viau va. Kan titi tui dun hle nghe nghe a ni.
On the kawng kawi
Chutiang chuan chhun ni sensa hnuaiah tluang takin kan tlan thla zel a. Mahse Kawlchaw lei kan thleng thla tep tawh tihah chuan beisei loh thil a lo thleng ta thut mai a ni! Kawng chu a lo kawi nghelh a, leiminin eng emaw chen a rawn hnawh thla bawk a. A zim em avangin chulaiah chuan motor eng chi mah inpelh theih a ni lo. Nimahsela engtizia teh reng nge ni, chuti lai hmunah kher chuan bus pakhat nen kan intawk ta tlat a ni.
Ri bur hi ka hria a, mi au ri tuar ka hre bawk a. Thil eng emawah na takin ka insawh chawrh a ni tih leh hma lamah thui tak ka invawrh chhuak a ni tih ka hre leh a. Ka lum deuh pup a, a thim deuh mup a, rei vaklo chu tihchawmawlhin ka awm a. Ka han harh chuan ka mi phurh pa chuan, "Kei chu ka na lo!" hi a lo ti lung lung a.
Thil awmzia
Ka han inbeng tho va, thil awmdan chu ka hre chiang ta uar uar a. Bus nena kan intawh thut khan na takin ko pang ka su a. Bus pawh chu min hel a tumna lamah kawng thlang lamah a lo liam ve tep hi a lo ni a. Ko pang kan han su chiah kha na mang kheng hian kan invawrh chhuak nghal a. A piah hlam thum bawr velah ka va intheh bawkvak tawk mai a. Ka mi phurh pawh chu ka hnung chiahah ka mawng rawn hnim tawk vel hian a rawn intheh phei ve chawpchilh nghal bawk hi a lo ni a. 'Posi' chu a mawihnai lo khawp ang le!
Ka bike chu ka han enchiang a, ka lung hi a awi mawlh lo. A hma lam wheel rim a sawi nasa a, a disc brake invuahna lai chu a keh vek bawk a, a fork pahnih chu hnung zawng leh dinglam zawng hian a kawi ingeuh ngur mai a, a lu bawr phei chu hmuh tlak loh khawpin a sawm hneh a ni. A fakna lamah phei chuan nula kawngkal pawh thlek kual thei, "definitely male" a nih vei nen khan leh!
Ka awmzia
Ka invawrh chhuah laia leichar ka nawrna khabe chu thuk takin a kak a, a thi zawih zawih mai a. Helmet full face khum lo phei i la hmai mam maih khawpin khawvel ka nawr dawn a ni tih kha a chiang khawp mai. Ka khup, ka dul, ka kiu leh ka ban vela pem leh vun chhe hih tur luklak chu sawi vek sen pawh a ni lo. Ka khup phei chu chawlhkar hnih zet ka bawksawp zui phah nghe nghe a ni.
Khatih lai taka thlalak lam ti mi an lo awm remchang lo hlauh kha ka tan vanneihna a ni. Ka kekawr khup lehlam lehlam kha a thler thla hnuang mai a. Ka jacket hma lam chu a thler nual bakah thisen a kai nual bawk a. Ka khabe thi tih reh nan rawmawlin ka chhip lamah ka vet chho va, a ti nghet turin ka kalpuipa lukhum parh chuan ka khum hnan a. Ka taksa pumpui mai chu vaivutin a paw thung mai bawk a. Apache ho sawisak hrep hnu, thlalera cowboy vakvai hi ka ang ber mai awm mang e ka ti!
Zahna kawn
Kawngpuia chesual ta chu motor veivak apiang an rawn ding zel a, min rawn en kher zel bawk a. Chetsual hi rin aiin a lo zahthlak! Mi an that poh leh zah a zual ting a ni ber mai. Mahse a aia zahthlak a la awm!
Chetsualna hmuna kan buai vel lai chuan Lawngtlai lamah thuthang dik lo a lo leng ve mek a. "A inhliam na hle..." "A nat deuh avangin Aizawl lamah an phur tlang dawn..." tihte leh thudik chiah lo eng eng emaw a lo thang hman nual mai hi a lo ni a.
Chung thuthang vel avang chuan ka quarters-ah chuan mi eng emaw zat an lo pung khawm a. Sunday School thutthleng te hawhin, thalai lamin thingpuite an lo lum bawk a, chetsualna hmun lamah lamkal an lo intir bawk a. Ruang hmuak tur ang hrim hian an lo phu suau suau mai hi a lo ni a.
Chutihlai boruak tak mai a In ka thleng, kan kawngkapui ka pen lut tur a zaha ka'n zah zia mai chu a sawi hian a siak lo! Min ngaihven a lo kal an ni na a, ka rilru tak chuan ka ngei rum rum mai. Min ti zak em mai a!
Thih theihna khawp chetsualna atanga ka him tlat dan te kha ka ngaihtuah zui fo va, ka vanneihzia ka hre thar leh thin. Darthlalanga ka khabe ser ka hmuh apiang hian, "Thihna nena kan inkar chu pen khat chauh a ni," tih leh "Tihborala ka awm lo hi Lalpa zahngaihna a lo ni," tih Bible thu hi ka hrechhuak ziah thin.
