Min hrechiangtute reng rengin lam lamah kher hi chuan chim sang vak tur chiah min ngai ngai lo. Party-na leh lamna hmuna loh theih lohva tel a ngaih paw’n a fatu lama tang chi, mite hnawksak tih riau chi ka ni. Kalvari dance lamah pawh ka chuti teh lua lo. Sawi tur ting chuan awmhmun thawhsan meuhva lam hi ka nei ve nual tawh. Mahse ka zei ngang lo! Chutiang mi chu ni mah ila hei pui, ka lam ve leh ta tlat pek mai!
October 18, 2008 a ni a. He ni hi abikin UK-ah chuan lam runpui ni a ni!
‘Big National Ceilidh’ an ti a, hemi zan hian ram chhung hmun hrang hrangah a huhova lamna chi,
ceilidh dance-in mi sang tam tak an lam thup thup mai thin hi a lo nia. Mite tanpuitu pawl pakhat
WaterAid tana sum tuakna a ni nghal a, a luh man pawh £8 lai a ni. Hetiang hunah hian
live Band-in
music an tum rema a huhova lam a ni thin a.
Pair engemawzat kha hlawm hrang hranga in thenin an ding tlar thup mai a. Chutah
‘caller’ an tih mai chuan lam tan hmain lam dan tur a rawn sawi a. Zir chawp a, lam nghal zel kha a ni tawh mai.
Hemi ni ber kher hi ceilidh dance-a tui em em mai Rob-a te nupain chaw eia min sawm ni a ni hlauh mai pek a. A tirah chuan lam thiamho lam min enpui dawn emaw ka ti a. Chaw kan han eikham chu, “In bo lutuk loh nan…” tiin an living roomah chuan lam min zirtir ta chiam mai a! Chutah The Heath Park, Cardiff-a lam tur chuan kan phek chhuak ta a ni. Ka va han huphurh teh reng e aw!
Programme an ruahman dan chuan zan dar 8 atanga dar 11:30 thleng kha lam ngat ngat mai tur a ni dawn a ni! Hall chhung kan han lut chu le, mi zahnih rual vel zet tur hi live music remin an lo lam suau suau mai a. Ka’n thlir vang vang a, ka luh ve loh tawpna turah ka lut a ni, ka ti rilru vang vang tawh mai a. An lam dan lah chu kalphung fel tak nei, pakhatin a tihsual palh chuan buai nuai thei kha a ni reuh leh nghal a. Mahse lam tura kal kha kan ni miau a, ka lam ve ngei chu a ngai dawn lawi si a ni!
Rob-a te nupain an han beih lauh lauh tawh hnuah chuan ka hun a thleng ve ta! Rob-a nupui Diane-i nen chuan lam tual lamah kan inkai lut ve zan zan mai a. A tirah chuan ka che phelh ang reng fu. Luh lohna turah te ka lut a, mi din laiten ka tlum ang zuk zuk a, vir kual hunah te khan a ni lo zawngin ka lo her thul. Ka hmaa nu pakhat mawng te kha ka va pet fuh teuh e! Diane-i pawh khan atirah phei kha chuan lampui harsa min ti ve ngawt ang!
Chutiang zela kan han beih chhoh fe hnuah chuan zan dar 10 a lo ri a. Big National Ceilidh apianga tih ngei ngei, inkai kuala lam hun a ni. Khawi hmun pawh ni se, he hun an hmanna hmunah tawh phawt chuan zan dar 10-ah chiah hian music inang ‘Jamie Allen’ ngei mai chu an play a, lam dan inang ‘Circassian Circle’ an tih chuan an lam kual thup thup thin. Hei kher hi chu a style a mawl bawk a. Nuam ka ti ve ngang mai. ‘Rau’ kha a nei ve tlat a ni! Chau hnepa kan han intheh kual vel hnuah tap dance show kan en leh te te a, kan tin ve ta a ni.
A pui a pang, a lian a te, rual ban leh ban lo te pawh a duh apiang huap, ruih leh buai awm lo, mi rethei zawkte tanpuina ni pah fawm a huatna tel hauh lo va mi zahnih dawn mai han lam ho suau suau mai kha chu a thianghlimin a ropui danglam ve hrim hrim hian ka hria a. Inchhir pawh ka inchhir duh ta lo.
12 comments:
Kan hotute meuh in han lam tak ah chuan he khawvel ah hian zirtur hlir alo ni si tih te min ngaihtuah tir!!
"Amah nen kan in pawl chuan ,damchhung ka tawh a piang hi lawmna tur hlir alo nisi" tih hla ang deuh khan ..!!
Ni e, harfim kar maia hlim tak a thiltih hi alo nuam ber mai. A lam dan step te ahar em? :)
@avena, nia tiraw zir tur hi a lo tam thei dawn khawp mai a lo ni, he khawvel ram zauvah hian!
@sekibuhchhuak, ni e, party leh lamnaa ruih kher tur emaw tihte hi a lo ni vek lem lo a nih hmel khawp mai. A lam dan hi khirhkhan tak a awm lem lo. Mahse newcomer tan chuan inchhuih deuh nawk nawk chu a awl!
E khai chanchin hriat a khat ta hle mai maw thil alo danglam ta hle mai..min la hre ve em ang chu maw??!! I lam lai chu LIVE ngei mai a hmuh ve chakawm hle mai Hotupa...Chhimbal lam chuan a tibuai pha ta lo hle mai che hehe
Ekhai, kan hotupa lam chu hmuh a chak awm hle mai. A hring a hranin hmu pha mah suh ila, i thuziak atang erawh kan lo suangtuah thiam sawih sawih e.. Lam hi western lam hian an lo uar hle mai a. Keipawh vawikhat chu sister pakhat hian kan han lam ta a nih kha.. pheikhawk a bun si lo, chhuatlaiah a ke ka han rah sak palh hlauh mai chu, pawi tak a ni.. i che chhe ve zauh zauh ngei awm si a, rawn tarlang thin teh khai hotupa..:)
@lmok08, e khai kan hotute... nang a lawm reh vang vang le! Ni e, hei han beih ho vel a chakawm khawp mai. Chhimbal chuan lung a va ti leng ve aw... Taka, "ri ret ret" ka hriat kha a tak tak a thleng tawh em aw... Beng kan lo tun ve reng a nia
He he hotupa puia, zei hlah hlah tak maw le kan nih, keini te chu! Tihsual tih velah hi chuan i lungngai vak lo phawt ang, professional ho paw'n an tihsual ve chawk hi! Heti lamah hi chuan hotupa avena nen hian in ngahtuahawm loh khawp ang ka ring...
Khawvel lehlam atang paw'n min lo la hre ve a a lawmawm e. Ri ret ret kha a ri ta rut rut a...12th Sept. khan a hmawr kan bawk fel tawh e..contact na tur che ka hre si lova ka inthiamlo duh ta lemlo hehe..hlim taka i awm zel ka duhsak a che.
E heu LM leh! Min lo thlim pek ani maw :-) Tak takah chanchin lawmawm a nih chu. Theih ni se awm ve a chak awm nen a aw... Tlaikhawhnuah in inneih ka lawmpui takzet che u. Hlim tak leh tluang taka chhungkua in din ka duhsak a che u.
He he! Tun chinah mail inthawnin kim biai a thawn tawh tur aw unaupa...
Hei i rawn thun dik a lawm. I mail ai chuan a thui daih zawk a nia. Tak tak a, mail-in ka rawn chhan tawh che kha, i lo hmuh tawh ka ring e.
Wow...ngaihnawm ve aw....ka lam ve thiam hrim hrim ang nang meuh pawh i suk rem thiam chuan...hehe
LeaszRalte, thanks! Nia, nang chu i ngaihtuahawm lo hrim hrim ang. Mahse, kei zawng ka tling lo a ni:))
Post a Comment