Hringnun Thuahthip

Ka duh danin ka chungah a thleng lo va,
Ka duh danin thil ka thlen tir hek lo;
Harsatna te hi hneh ka duh a,
Harsatnain min hneh si;
Ka beisei malsawmna ka dawng lo va,
Mi dang tan malsawmna ka thlen hek lo;
Thinlung hi hlimin lawm reng se ka duh a,
Hlimna leh lawmna tur ka hmu si lo;
Ka mamawh hunah tanpuina ka dawng lo va,
Min mamawhtute ka tanpui hek lo;
Ka chenna khawvel hian nui hmel pu reng se ka duh a,
Chu khawvel chu ka ep tlat si;
Muang taka hahchawlhna ka hmu lo va,
Phur rit phurte tan hahchawlhna ka ni ngai hek lo;
Hmangaihtu ngaiin ka hawi vel a,
He thinlung hian hmangaihna a pai si lo;
Khawvelah hian damchhan neiin ka in hre lo va,
Tu tan mah damchhan tlak ka ni hek lo;
Pathian hnen atangin thil ropui ka beisei a,
Pathian tan thil ropui tih ka tum si lo;
Ka tawngtaina chhanin a awm lo va,
Chhan tlak tawngtaina ka hlan ngai hek lo;
Rinna, hmangaihna, dawhtheihna, tlawmna leh huaisenna,
Ka neih tlat loh avangin.

Khuanu’n rem a tih chuan kum a lo thar leh ang,
Chu hun thar lo thleng chuan he hringnun tan hian
Remchanna leh chona thar a rawn her chhuahpui ang a,
Malsawmna te, hlimna te, hlawhtlinna te’n

Min lo hmuak leh dawn;
Mahse he hun thar malsawmna hi

Ka tan engmahlo mai a lo ni leh ang,

Engkim a kuta kawltu leh neitu chu ka rinchhan loh va,
Finna thinlung nei tura

Damchhung ni ka chhiar thiam si loh chuan.

Krismas Chibai

Kum 1997 Krismas kha Calcutta-ah ka hmang a. Chuta ka lungleng pheng chuan Mizoram House-a thawk kan thiannu Apuii cassette bawm ka va hai a. Anne Murray Christmas album nalh mangkheng mai chu ka va hmuchhuak hlauh mai a. Chuta nalh ka tih zualte zinga mi chu 'Christmas is Coming' tih hla hi a ni.

Chuta tanga kum riat (2005) hnu-ah chuan Lawgtlaiah Krismas ka hmang leh daih thung a. Chumi kum chuan he hla hi ka rilruah a lo thar leh a. Mahse a cassette nei ka hre mai lo. Mak deuh maiin ka thianpa Dr. Muantea'n a lo kawl hlauh mai a ni tih ka hre tlaikhawhnu a. Ka hawh ta a, kum 1997-a ka ngaihthlak Apuii cassette tho kha zu ni tlat a!

A hla thu thenkhat hi Mizo ngaihtuahna atang chuan a fiah vak lo va, mahse a lunglenthlak hle. Tichuan he hla 'idea' rilrua vawng chung si a Mizo taka siam tul tihna ka nei ta a, 'Krismas Chibai' tih hi ka bitum ve ta chawt mai a ni. Chang khatna leh a thunawn hi Lawngtlaiah a piang a, a dang zawng hi Durtlangah a piang thung.

Hei, ka u fate unauin an han sa ve a, kum 2005-a an record a ni. Zoramchhani'n hmannia a Krismas album tihchhuah tharah khan a sa bawk.

Lamhnai leh karhlaa lenrual awm zawng zawngte, hei hi in tana ka 'Krismas present' lo ni rawh se.

KRISMAS CHIBAI!

Aw Bethlehem!

Aizawl-ah Bethlehem veng a awm. Khawmawia Pu Tawndirthanga fanu chu Laledenbethlehemi a ni. South Africa leh Pennsylvania-ah te hian Bethlehem city a awm tlat. Bethlehem church te hi khawvel hmun tinah a awm emaw tih tur a ni hial mai. Connecticut-a khaw pakhat chu ‘Bethlehem, the Christmas Town’ an ti kher! Hmun, ram, in leh zirna hmun, Bethlehem hming chawi hi khawvelah a thahnem khawp mai. Krismas boruakin min han tuam tak tak hi chuan kan la hmuh ngai reng reng loh Bethlehem ngai hian kan kur thin a nih hi! Chutiang taka Kristiante thinlung luahtu, khaw namen lo tak mai chanchin sawi hi thil tihawm tak ni ve tlata hriatna ka nei a. Mizopa ngaihtuahna atangin, a vate khawthlirin Bethlehem leh a chheh vel i’n thlir thuak thuak teh ang.

Bethlehem Tlang
Bethlehem tlang tih kher hi chu kan Bible-ah kan hmu lo. Mizo thinlungah erawh ‘Bethlehem tlang’ a ni. Davida pianna leh lal atana hriak thih a nihna hmun, Jerusalem atanga mel nga leh a chanve a hla, ‘Davida Khawpui’ tia sawi thin hi a nep lo, a te ber tawp lo.

Hmanah, BC 700 vela zawlnei Mika’n he khuaa ‘Awptu’ a lo pian tur thu a hrilhlawk atang phei kha chuan Bethlehem hian mi ngaihven a hlawh leh zual a. A hrilh lawk ang ngeia Lal Isua a lo pian tak atang phei chuan khaw thianghlim, khaw ropui leh hmingthang, Krismas vuakvetah phei chuan ngai em em a kan kurpui thin khaw ngainatawm a lo ni ta. A khua te hmuin la tlawh ve lo mah i la, Mizo thinlungah chuan ‘Bethlehem tlangpui’ hi a inkham ruah reng mai a nih hi.

Bethlehem Khual Buk
Khualbuk zawng zawng zingah hian Khualbuk hmingthang chu a va ni em! Lal Isua thlenna pawh ni lo, a thlen tak lohna kha a ni chauh leh nghal a! Isua kha thleng ta phei se engtiang taka hmun pawimawh nge a nih zui ang aw…

Professor pakhat Todd Bolen chuan khualbuk tih hi lehlin dik lo a ni, a ti tlat mai. Greek tawnga kataluma tih hi man chawia thlenna khualbuk (inn) ni lo vin, mikhual pindan (guest room) sawina zawk a ni a, he thumal hi khualbuk sawi nan Luka’n a hmang ngai lo, a ti. Hming ziak tura mahni khua theuh va kal kha an ni a. Josefa pawh Bethlehem khaw chhuak a nih avanga he khua hi pan an ni.

An khaw hlui a ni bawk a, an chhungte chu an han pan ve ngei a, mahse an ‘mikhual pindan’ah hmun an chang tlat lo. Eng nge a chhan? Josefa te nupa kha Juda danah nupa tak (legitimate couple) an nih loh avangin an chhungte hian an lo pawm thei lo a ni, an ti. ‘Khualbuk vengtu’ tih Bible-a a inziak lo chunga “Khualbuk vengtu i ui lo’m ni…” tia kan tap per pur mai thin te hi kan lo ti dik ngut na nge maw? Engpawh ni se, chungnungberin thlen in a hnawng tih erawh kan chiang.

Bethlehem Bawng In
Kan Bible-in Isua thlenna kha bawng in a ni tih a sawi lo, bawng in a ni lo tih a sawi chuang bawk hek lo. ‘Ran chaw pekna thleng’ chauh sawi mah se, bawng hi an ranvulh pawimawh te zinga mi a nih ve avangin Bawng in a ni lo, kan ti ngawt thei chuang hek lo. Mahse, kan hla phuahtu leh letlingtute hian engtia Bawng in lo ti tlat mai nge maw an nih aw?

Mizovin ran in kan sak zinga mihring chen ve theihna mai tur chu Bawng in hi ni maiin a lang. ‘Bawng in’ tih tluka Mizo rilrua fiah tur ran in dang sawi tur a vang khawp mai. Chuvangin kan hlate pawh hi hemi rilru atanga an lo siam a nih ka’n ring ve ngawt a. Eng in pawh ni se, mihring chenna tura ngaih loh, ran in-a khawvel chhandamtu a piang tlat mai hi mak zawng a mak a ni!

Kan Lalpa pianna hi bawng in a lo ni chiah lo a nih pawhin he Mizo Kristian thinlungah hi chuan ‘a pianna Bethlehem bawng in tlawm,’ a ni reng fo vang. Hetah, kan thinlung bawng inah hian a piang tlat a lawm!

Bethlehem Arsi
Bethlehem hian ama pualin arsi a nei em ni? Khawvela arsi hmingthang ber hian Bethlehem hming a chawi tlat. Hmu ve hawt lo paw’n ‘Bethlehem arsi engmawi’ tiin kan han kur ngaih ngaih zel mai a nia! Mifingte khan an fin man an tel chiang khawp mai. Isua an hmuh bakah he Bethlehem arsi avang hian dai leh tawh ngai lo turin an hming an chher!

Bethlehem arsi hi engnge a nih chiah, tih chungchangah zirmite ngaihdan a thuhmun lo. German astronomer Johannes Keplera’n BC 6 vela Jupiter leh Saturn intawhna avanga arsi eng thut lo awm (nova) chungchang a sawi te, Korean leh Chinese arsi zirmite’n BC 5 vela nova emaw simeikhu emaw a lan ngei thu an sawi te, mithiam thenkhatin hun engemaw chen lo lang thin Uranus chu Bethlehem arsi nia an rin thu te hian beng a verh hle. Thil tak tak ni lo, Christian hmasa ten an chher chawp (myth) mai mai nia ngai pawl an awm bawk.

Engpawh ni rawh se, Bethlehem arsi hi kan thinlungah a fiah. Kan Lalpa pianna kawhhmuhtu arsi ropui a ni a, Lei leh van Lalber a piang a ni, tih min hrilh tu ‘Bethlehem arsi eng mawi ber’ a ni reng dawn!

Bethlehem Dai Reh
A hming atang ringawt pawh hian lung a leng nghal ruih thei nia! Hei pawh hi dai zawng zawnga dai hmingthang ber a ni chiang khawp ang. He daiah hian a ni, khawvela Krismas hmasa ber chu lawm a lo nih!

Vantlang mawngphaha awm, berampute thlasik dai fim hnuaia ngui tak leh khawhar taka an lo awm lai mek chuan kha Bethlehem dai rehah khan ‘the greatest Christmas celebration on earth’ chu a thleng! Chatuan khua a var ta! Berampute’n ropui an hmu! He naupiangin a rawn thlen chanchintha hi ‘mitin ta tur' a ni tlat. Chu chu mi’n a dawn tawh chuan he thinlung ‘Bethlehem dai khawharah’ hian Krismas ropui a thleng reng thin a lo ni.

Chutichuan…
J.F. Wadea’n “Hlimin leh lawm takin Bethlehem khaw lamah chuan lo haw rawh u’ tia ringtute min sawmna chu Patea’n, “Aw Bethlehem tlang ka thlen hma chuan chawl lovin ka kal ang,” tiin min lo chhan sak tawh a. Hei hi kan hla tur ni kumkhua se. La hmu miah lo pawhin inthlahrung miah lovin, “Aw nang Bethlehem ka va ngai tak che em” i ti ngawih ngawih mai ang u. Bethlehem hi zawng mita hmuha fiah a ni lo va, a hmuna kala chiang a ni hek lo. Thinlunga thleng fiah chi a ni.