Thuchah Ropui

Kawtchhuah ta ngang chu pawimawh eng emaw avangin Kolkata khawpui hi ka tlawh ve ta zauh zauh va. Sawmkua panga atanga sawmkua pasarih inkar vela lehkha zira kan awm ve hun lai leh kumin sanghnih pariat-a a khawpui awmdan lo danglam tak dan te hi sawi fe tham chu a awm ve awm e. Khatih lai khan a nei deuhvin pager an paipawn bak chu mobile phone rim-ara pawh kan la hre lo va, zan dar kaw hnu lama STD tlawm hun changin kan intlar ve thap thin kha a nia. Computer kan la hmuh phak loh avanga typewriter ngata thesis kan chhut zawh thak lai te, kar tawp apianga Kalkata chanchinbu stencil-a chhua Gariahat lama Cyclostyle-a kan va her tir tlauh tlauh thin lai te khan hmanlai an chang ta takzet mai.

Kawngsira dawr te tak te te hmun tina hmuh tur awm te, foot path-a inhmun lo ram lo bengbel ve ngawt ang chi te, kawngzawh leh bandh te chu a ngai te tein lo la awm mahse, over-bridge hrawl pui pui inkham reh ruah te leh lirthei lo pung ta te chuan Kolkata khawpui hmasawn zia a tarlang tho tho mai.

Dominique Lapierre-an ‘City of Joy’ tia a lo sawi, he khawpui ropui tak chanchin hi ka sawi tum pawh a ni chiah lo. He khawpui hi paltlang satliah lo deuhvin tuntumah hian ka lut leh hlawl a. Hun kaltate ngaihtuahin ka’n phul liam satliah ve mai zawng a ni e.

Kolkata daifema thingtlang khaw pakhat, Serampore hi i’n hmer tel lawk teh ang. ‘Father of Modern Missions’ an lo tih, missionary ropui William Carey-a leh a thiante pahnih, Marshman leh Ward-a ten University ropui tak bul an lo tanna hmun he khaw te tak te hi a lo te ber tawp lo mai. He hmun hi India rama Pathian thu zirna lian tham zawng zawng khaikhawmtu Senate of Serampore College thuthmun a ni a. Arts, Science, Commerce leh Theology subject te zir theihna, he college danglam leh ropui taka Principal chu Mizopa a han ni tlat te, Mizo professor pahnih an han awm ve leh zel te hi thil namailo tak chu a ni phawt mai. A campus chhunga Carey-a te sulhnu tam tak hmuh tur la awm te, piah deuh va Carey-a thlan cheibawl meuh loh va lo awm te, Carey-a lo chen thinna In ngei a ka han thleng ve tlat mai te chuan chhungrilah mi a khawih ru ve tlat a. College hrul mai a luang Hoogly lui nu phut mai, lui thianghlim ni tlat si te pawh chuan eng emaw zawng tak chuan lung an ti leng ve tho mai.

Serampore chanchin pawh hi ka sawi tum tak chu a la ni lo fo. Mahse, he hmun atanga Kolkata ka let lehna kawngah hian a nia thuchah ropui chu ka ngaihthlak tlat ni. Hetia thusawi tur han peh hel kual vel hi sim pawh ka tum hlek lo a nia!

Serampore Railway station ka chuang chhuak chiah chu ralkhatah hian rel lu hi a lo lang va va a. Chu chu ka chuanna tur a nih thu ka bula ding pa pakhat chuan min hrilh a. A lo thleng a, tih dan phung pangngaiin ka hma zawnah chuan a biling a balangin ka invawm lut nghal a. Mi chi hrang hrang kan ni ang bawkin rim chi hrang hrang pawh a leng vel nasa hle a ni. Rela ka petek luh rual chuan pa pakhat Bengali tawnga thu lo sawi piap piap mai hi ka va hmu nghal a. Thahnem a ngai takzet mai. A kamis var nawh mam vak loh chu a kekawr dum, hak rim ve tawh tak tih hriat takah chuan a beng lut a. Mangai pheikhawk khawro lam hi a bun a, savuna siam ip khai te tak te hi a dinna bul hmun remchangah chuan a nghat bawk a. Chu ip chhungah chuan engtiang taka thil hlu nge awm tih chu hun rei tak chhung ka hre thei lo nghe nghe a ni.

A thuchah sawi chuan amah pawh a hneh hle a ni tih a hmel leh a chet vel dan atang chuan a rin theih a. Chu a ‘chanchin tha’ chu kum tamtak a lo vah pui tawh thin a ni tih a ngaihruat theih bawk. Chutiang taka thlansa phul kai leh hrawk phiar tawng tawng khawpa sawi tul ta chu thu satliah a ni hauh lo vang tih kei paw’n ka ring thlap mai. A thusawi pah chuan a vei kual vel thul a, a mimal taka ngaipawimawh ni awm taka tute emaw han kun hnaih bik deuh chang te a nei bawk a. A chang chuan Naupang Sunday School class la te pawh hi a ang rum rum mai. Pathian thu a sawi em ni, han ti dawn i la eng company hming hming emawni hi a chham tel nawk nawk ang lawi a.

Tih than tawh avanga aw chhang au pawp laklawh tawh tih hriat takin a aw pawh chu a tham mawi tawk hle a. A ‘thlaraubo hmangaih aw’ riau hian ka hre tlat pek mai. A han uar deuh zawnga a aw rawn tham tial deuh te hlei hlei chuan a thusawi chu a ti convincing ting emaw tih tur a ni a. A voice control bakah a eye contact leh a gesture te chu homiletics lam thiam mite paw’n sawisel tur an van ve ngawt ang. Chutiang zelin a communication skill ropuizia te pawh chu communication leh media lama mithiamte paw’n an pha hauh hian a rinawm loh va. Kohhranho thlarau lam nun a ngui vanglai taka speaker-a rawih han duh ta mai mihlim nuho pawh lo awm nual ta mahse a awm lo hran hek lo vang.

Chutianga eng emaw chen a au vel hnuah pawh chuan a ‘sermon’ thuhma a sawi zo chauh hi a lo la ni a. A hma zawnga a thusawi hrethiam ve lote tan pawha hlin thelh hlek tawh loh tur khawpa chiangin action nen a bei tan ta. A thuchah main body chu kei meuh paw’n ka hrethiam ve pha ta ngang mai le! A savun ipte chu a han zen a, a chhung atang chuan a hlutzia hrilhfiah thiam rualloh niawm khawpa lang ‘rangkachak thi’ design hrang hrang chu a rawn phawrh chhuak a. An va han tle mawi hlawm teh reng em!

Chutah engti kawng maha tihchhiat theih chi a nih lohzia entirnan chu thi ngei mai chuan kahpathira siam rel bang chu na mangkheng hian a nawt ta chiam mai a. A rak ang nawk nawk bawk a. Engtia chutiang thil hlu chu sawisa ta chiam mai nge a nih, tia ka ngaihtuahna a vahvel mek lai chuan chu rangkachak thi chu a rawn khai chhuak ta a. Engtinmah zu hmelhem chuang hauh lo va! Chutah zet chuan ‘campers’ te paw’n ‘speaker’ lamah chuan kan beng kan chhi ta thup mai le.

A la duh tawk ta lo cheu. A ip khaia a pai tui tlemte chu rel chhuatah chuan a han leih a. Chutah chuan a ‘rangkachak thi’ chu dahin rel chhuat tuiek khawk kawi zuih khawpin dim baksak lo hian a rap hrual leh ta a nih chu! ‘Rangkachak thi’ chuan hmel a lawi a put hi a rin a rin chi rual a ni tawh lo. Mahse ngai teh, chuti khawpa sawisak retheih a tuar hnuah pawh chu ‘rangkachak thi’ chuan a hmel ngai reng a la pu tlat a, a la tle siau siau tlat! “A nakah ngei chuan zen ta che u” ti niawm tak hian cheksawlh tinreng tuar hnu chu thi ngei mai chu mipuiho kutah chuan a han pe zui a. ‘Campers’ ho hmelah chuan lungawi taka inhlan duh hmel hi a hmuh theih tawh a. Kan en ngawih ngawih tawh mai a ni. Kan veng nuho thenkhat chu awm se an ‘hallelui’ tuar tuar dawn tih ka hre reng.

Chutah zet chuan thuchahin a vawrtawp a thleng ta. Speaker chu inrintawkna famkim nen a han hawi kual vel a. “Hetiang thil hlu hi in duh lo a nih chuan in thu thu ni rawh se…” ti niawm tak hian a hmel chuan induh lam hmel hi a pu mah mah tawh zawk a. Duhthlanna kawr ruamah hnuh luhin kan awm ta. Chhungril lamah thawktu eng emaw tak a awm tlat tawh avangin puanchhuah si loh thil inup chuan chu rel pindan chu a fan vel a. ‘Speaker’-in sawmna a han siam zui ta mai chu le, kiltin atang hian an rawn inhlan ta zawih zawih mai a ni.

Chu thusawi ropui tak hlawhtlinna chu speaker chuan a tel ta ta lawih mai. Mipuite chuan an robawm hawngin an sum hlu te chu an rawn phawrh chhuak a. Engti kawng maha chhe mai mai thei lo khawpa tha, a ‘rangkachak thi’ zawrh hlu leh ropui tak mai chu pakhat cheng sawm zelin an lei ta diat diat a.