Information in nei em?

Kum 2003 kha a ni ta awm e. Lawngtlai Synod Bookroom-a ka lo thut lai takin nu berh ve tak pakhat, 'tui thlang' lam atanga chi seh lama lo kal chuan Bookroom chu a rawn dai lut ve hlawl a.

"Information in nei em?"
"Pawl engzat nge?"
"Pawl li"
"Aw, nei e"

Dawr nghaktu chuan chhuar pakhata lehkhabu pan ang reng tak chu a rawn la chhuak a. Ka'n en chian chuan chu nu thil duh chu Pawl li zirlai bu 'Information Technology' tih chu a ni tih ka hrethiam ve ta chauh va. Chu zirlai bu chu engtik atangin nge Primary School-ah an lo zir tan ka hre lo. Lawngtlai atanga mel za zeta hla, mau tuai leh dangpuithu-a chawm len naupang te paw'n an zir mek a ni tih erawh ka hre chiang.

Hetih hun lai vel bawk hian Lawngtlai atangin khawthlang lam tlawhin ka zin chhuak a. Khawmawi-a kan missionary te'n duat takin min lo mikhual a. Ka thlenna bul Mission School chu ka tlawh turte zinga mi a ni a, exam lai a ni. Zing chaw eikham, school tan hma si chuan kawt velah naupang lehkha zir an lo ri nak nak a. Kawtah ka han chhuak a, thing zarah te chuan naupangho chu an lehkhabu nen an lo fu fer fur mai a! An thil chhiar ri chu ka han ngaithla ngun deuh va, 'Monitor, CPU, Mouse, CD-ROM...' tihte chu a rawn ri tel ta nawk nawk mai! Ka han zawt chiang a, chung Bawm naupangte chuan 'information' an exam dawn a lo ni!

Khatih hma zawnga ka ngaihtuahnaa awm lian tak thin chu, "P.U pass hnuah pawh kum nga zet riah chilh meuhvin ka inzir a, ka graduate tawh bawk a. Tuna ka thawh ang thawh nan chuan a tawk thawkhat e," tih hi a ni. Mahse heng ka thil tawn ho tak anga lang te hian eng emaw ti takin keimahah thu an sawi tlat a. Ka dam chin reilote chhung pawh hian he khawvel hi nasa takin a lo danglam hman reng tawh a ni tih leh chu khawvel danglam zel chuan thui fe min lo tlansan tawh a ni tih 'ka chiang thar' ta tlat a ni.

Chu 'chian tharna' chuan zirna sang zawk zir turin min nawr chhuak leh ta nge nge a. Ka han zir zo leh meuh chu, 'a hma' leh 'a hnu' inthlauhzia kei aia hre chiang an awm hauh lo vang le!

Khawvel hmasawnna leh changkanna vir mup mup karah kan khawsa a. Keini hmanni lawka piang te paw'n kan naupan lai hun leh tuna naupangten an hun tawng mek inthlauhzia chu nasa tak a ni tih kan hmu a ni a. Hetih lai hian kan ram hruaitu, Kohhran hruaitu, khawtlang hruaitu, etc. zingah 'rinna nghetin kawng hlui tha kha zawhin..' tih hla ang deuh va tih dan hlui sahuai thing vawn tlat mai, awmze neia thang zel turin zir belh ngai an nei a ni tih pawm hlei thei hauh lo, an hriat than khawvel bak khawvel dang a awm a ni tih hre mang hauh lo an kat nuk em aw?

Luang thli chhem nghin ang mai a 'lehlam lehlama vawrh leh len len naupang' erawh nih kan tum tur a ni lo vang a. Amaherawhchu awmze nei a thang leh hmsawn tur chuan a hunlai mila chet lak thiam a tul a. Chutiang ti thei tur chuan 'tunlai thil awmzia' hi a tawkfang tal hriat a tul thin a lo ni.

Information in nei em?

Stratford-upon-Avon

Pu Siamkima'n a chanchin a ziah ka chhiar lai khan hemi hmun ngei hi ka mitin a la hmu ang a, Stratford-upon-Avon leilung ngei hi ka ke hian a la rap ve ang tih reng reng ka lo ngaihtuah thleng pha lo. Mahse chumi ni chu a lo thleng ta tlat a. Vannei hi ka inti ve em em a ni. William Shakespeare-a hi tunge a nih a, engang taka ropui nge a nih, tih hi sawi ka tum lo va, sawi tul lah ka ti hek lo. He mi ropui pianna, a tuallenna leh a thihna hmun hlimthla thenkhat tarlan ve erawh chu tihmakmawh niah ka ngai ve tlat thung a ni.

Lui hmingthang, Avon lui kamah te chuan ka han hawi ve vauh vauh a. A chhan sawi tur awm chiah si lo hian lung a'n leng ve thla ngawt bawk a!

Holy Trinity Kohhran, Shakespeare's Church an tih deuh kher chhungah chuan Shakespeare-a chu an zalh a lo ni a. Maicham thlen hma, zawl deuh duai hnuai chu a zalna hmun chu a ni. Chhinchhiahna an tar mai loh hi chu thlan a ni tih tilangtu thil dang a awm lem lo. A thlana thu inziak hi a thu a un khawp mai.

Good frend for Iesvs sake forbeare,

To digg the dvst encloased heare.

Blest be ye man yt spares thes stones,

And cvrst be he yt moves my bones.

Shakespeare-a an zalhna bul chiahah chuan a nupui, Anne Hathaway pawh an lo phum ve reng a. Kan mi ropui ruang pawh a khawhar lutuk lo vang chu. A nupui hnenah hian a khum 'tha ber dawttu' chiah a hnutchhiah a, abak a ro dang zawng zawng chu a fanu kutah a hlan vek an tia. A mak ka ti ang reng!

A baptisma channa leh a phumna chhinchhiahnate chu roh takin an lo vawng tha thlap a. A phumna Biak In chhungah chuan bangah an lo tar a.

John Shakespeare-a In, Shakespeare-a pianna hmun nia sawi chu uluk tak leh duat taka vawnthat a lo la ni a. A hun lai chuan In ropui pangngai tak zawng a ni ve ngei ang.

Kawtthler velah te chuan mipui an zi nuai nuai a. Cafe leh dawr chi hrang hrang te chu an bawr luai luai reng bawk. Heng mipui zozaite hi William Shakespeare-a avanga hmun hrang hrang atanga lo kal khawm te an ni. Chutianga mipui insulpel karah chuan kawtthler lun laiah Shakespeare play lo chang mawlh mawlh tawk an awm bawk a. A ropui dangdai hle.