Thursday, March 6, 2008

Ngaihven Zui i La

News danglam deuh eng emaw a lo awm a, kan sawi zui luai luai a, rin thu leh finfiahna awm lem lo te pawh kan thutak sawi hmiah hmiah a. Chutiang chuan hmun tinah rumour kan tih mai hi a leng nuai nuai thin. Amaherawhchu reiloteah chanchinthar dangin a rawn chhilh leh a, kan sawi zui peih tawh lo mai ni lovin, kan theihnghilh zui ve leh ta mai thin ni ber hian a lang thin. Hei hi a thu azirin a that zawkna te pawh a awm ngei ang. Mahse thil pawimawh tak tak, bawhzuia chinfel ngai tam tak awm thin ang chite hi chu kan ngaihven zui a, dik taka chinfel a nih leh nih loh te pawh kan chhui zui ve thin hi a tul hlein ka hre ve thin.

Pa pakhat chu sum leh pai chungchangah a mualpho hle a, mahse a thianpa chuan, “Lungngai duh suh, an sawi rei peih chuang lo vang,” a ti. Hetiang hi thil awmdan a nih fo avangin mi tamtak chuan thil sual tih an ngampat phah a, mi dik lote an huangtau a, mipui lamin kan ngaihtuah zui lem loh avangin a chinfel lama mawhphurtute pawh hian an namnul zui ta mai mai em ni aw, a tih theih fo.

Mizote tluka titi leh inkawmho nuam ti hnam hi an awm kher lo vang. Thil eng emaw hlek a awm chuan kan sawi darh a, kan sawi khawm luai luai a, kan ti punlun nghal hluai thin. Mahse, a nawlpui hian thil tha ti tak tak tura pal tlang ngai “tha thawh” lai tak hi kan peih lo. Kan sawi peih, kan sawi thiam, mahse ka TI peih lo.

Kan pipute kha pem kual reng, ram thar zuan reng mai kha an ni a. An khua pawh hmun khatah kum sarih atanga kum sawm vel bak a ding ngai lo. Semi-nomadic tribe tia sawi thin kan ni. Chu “pem rilru” chu tamtak hian kan la thlah hlei thei lo va. A hun laia min nghawng na tak leh kan sawi luai luai pawh hi thil thar dang a lo awm ve leh chuti lamah chuan kan pakai san leh diak zel mai thin.

Jessica Lal case chung chang NDTV in a rawn phawrh chhuah avanga thil awmdan inthlakthleng nasat tak dan kan hria. Thil fel lo leh dik lo a lo awm hian a sarhu laia sawi hluai chauh duhtawk lo vin, “A nih dan tur ang taka bawhzui a ni em?” “Mawhphurtuten an tih tur fel takin an hlen chhuak em?” “Dik taka chinfel a ni em?” tihte hi ngaihven zui zel i la. Dik tak leh fel taka engkim tih a nih theih nan kan theih tawk theuh ti i la. Aw pawh chhuah taima lehzual i la. Hmasawnna pawimawh tak pakhat chu a va ni dawn em!

  © Blogger template 'Ultimatum' by Ourblogtemplates.com 2008

Back to TOP