His pain our gain

He milem chuang T-Shirt hi kum 2006-a OM Books, Chennai-a ka lei a ni. A hmaa thil inziak avang hian ka hmuh phat atangin he kawr hian min hip nghal a. A phuai deuh fap tawh hnu thlengin ka ha awl lo ta reng a ni. Tunah chuan khawi bawlhhlawh paihna hmunah emaw a tawih tan mek tawh ta ve ang.

Holy Week kan lo thleng leh ta a. Rilruin Good Friday leh Easter lam a hawi nasa lehzual ta. Chutih lai chuan ka ngaihhlut em em thin he T-Shirt thlalak hi ka hai chhuak nawlh mai a. A hun laia thil tam tak min ngaihtuah tirte chu rilruah a lo lang thar leh uai uai mai.

Lal Isua nun inkawlkalh (paradox) nasa lutuk mai hi thilmak a ni. Nunna tui kawltu kha kros lera tuihal a au kha a ni tlat a, chatuan nunna petu, mitthite kaithotu kha a mualpho thei ang bera tihhlum a ni a, thawkrim leh phurrit phurte tana chawlhna tiamtu kha thlan thisena far khawpa lungngaia mangang kha a ni tlat lawi si. Sualna nei lo mithianghlim, misual bawlhhlawh ber anga thiamloh chantir a ni tlat te hi a mak. Midangte tidamtu ropui khan mahni a inti dam thei tlat lo va, lei leh van Lal ni si khan mite hmuhsit leh endawng a hlawh tlat si. Pathian meuh han thih leh rih te hi khawvel ngaihtuahna atang chuan thil awmang lo lutuk a ni.

He thil inkawlkalh hi hrilhfiah dan kawng khat chauh a awm. Min hmangaih avangin Pathian anga awma, Pathian tluka awm chu thil thlakhlelh hleihtheihah a ruat lo va. Kan hausakna turin a rethei a, kan damna turin a tuar a, kan nunna turin a thi a lo ni!

Rilru hah avanga zanlaia han hui pap pap changte a lo awm a. Chutiang hunah te chuan tawngtaiin a lam han hawi i la, "Khatah khan ka kal tawh asin," tiin kawng a lo sat vek a, ka bo lohna turin chhawl a lo bang dim diam a. He kros thiltihtheihna avang hian, "Thih hlauhawmah kan awm, mahse hlimin kan zai," tih hla te hi mittui nen ka sa ta fo mai!

Hling lukhum i khum keiin lallukhum,
I thihna ka tan nunna a lo ni.

Pathian hmangaihna hi hei aia fiaha sawi thiam hi a va chakawm em!

Hman leh tun

Swansea khawpui hmun pakhata traffic light avanga kan din lai tak chuan kawng thlang lam chu ka zu hawi thla a. He in hian min lo ep at mai a. Ka'n en chian nak chuan Biak In emaw ka tih kha a lo ni hauh lo. Islamic centre pakhat a ni.

He In hi kristianten Pathian an biakna hmun a ni thin. Pathianniah te chuan mipui thahnem tak an lo kal khawm a, Pathian thu leh hlain an inpawlho thin. Hmanah chuan.

Wales ram hi reporter pakhatin, "Wales ramah Diabola hnuhma engmah ka hmu lo" a tih hial khawpa harhna nasa takin a tuam ram, Rome ho hunlai atanga kristian ram lo ni tan tawh, kohhran chakna ram, miten Pathian thu an lak urhsun em em thinna ram a ni. Hmanah chuan.

Hun a lo kal zel a, hmasawnna leh changkanna a sang tial tial a, nawmsakna leh awlsamna a nasa tial tial a, mite thlarau nun erawh a rawp tial tial thung a. Kristianna hnuhma hmuh tur a tlem tial tial a, kristian an nih leh nih loh pawh inhre chiang lo an pung tulh tulh thung. Tunah chuan.

Hengte hian nasa takin kohhran a khawih a. Mahni Biak In pawh enkawl zo tawh lo khawpa kohhran a awngrawp meuh chuan hetiang hian Mosolman unaute kutah kan Biak In te chu loh theih lohva hralh a lo ngai ta a ni. Biak In an khar zawih zawih a, sakhaw dang mite kutah a han awm ta mai te, Biak In tha pui pui sumdawnna hmun, apartment leh vantlang hmuna an lo chang ta mai te mita hmuh fo chuan rilru hi a na ve vawng vawng thin.

'Tun' hi 'hman' a lo nih hunah Mizoram kristianna hian engnge a an ve ang, tih hi ka ngaihtuahna luah tu a ni ta fo a. Star TV kan nei tan dek dek tiha School naupang thenkhatin Setana biak an han zir tan nghal ringawt mai te, information technology lamah kan mit a keu tan dek dek chauh tiha zahmawh thlalak siam leh thehdarh kawnga kan han hmanhlel nghal viau mai te, midang ang bawka sum leh pai uma kan han inpal thlu nawk nawk mai te hian ngaih an ti tha chiah lo a. Khawthlang kristianna paw'n a nep zawh loh heng khawvel hmasawnna te hian engtiang takin nge min la sawp chhoh zel dawn, tih te hi ka helhkam ta riau mai!

Titi

Lunglei leh Lawngtlai inkara khaw pakhat chu 'kawn thu khua' an ti mauh mai! He khua hi kei pawn ka tlan pel ve fo thin a, thlasik lai chuan an sawi ang tak tak hian a pui apang, a lian a te, kawnah nilum aiin an lo thu khup thin. Nilum ai ho chuan engnge an tih bera i rin? Chhan a har vak lo, an titi! 'Kawn thu veng' tia koh ve kher lem loh, hetianga nilum ai paha titi thin khua hi Mizoramah an thahnem fu ang. Tuntum chu kei pawh nilum hnung puak chungin khaw nge titi phungleng ka'n vawrh teh ang!

Tapchhak zawl titi, pum titi, kawtchhuah titi, nula rim titi, thlan lai titi, khawhar in titi, e khai kan va titi nasa teh lul em! Mizo nunah khawi hmun mai pawh hi titina hmun a ni ta mai emaw tih tur a ni. Khawhar lenpuinaah pawh kan titi luih luih a, kan nui hluah hluah thei zel mai. Mizo kristian hmasa te pawh kha inkhawmnaah pawh an titi leh luai luai thin an ti.

Ram a han buai a, takchhak zawlah, lungthu tlawh chhanin Indira Gandhi, India sipai, Assam sorkar, UNO leh Arakan tih vel kha an han sep kual vel ta thin a nia! A 'effective' dan tak hre chiah lo mah i la, ropui ve tak chu a ni hrim hrim mai. Thingtlang pa berh ve te emaw tih pawh hi an han titi tak tak chuan politics chungchang te hi sawi tur an lo hre ril phian zel reng a ni.

Khawiah pawh hian titi thiam bik hi an lo awm zel a, an bula awm pawh a nuam phian zel. Vawi khat chu kan khua hian, a tia lawm kan thian pa'n, sangha tlang vuak kan nei a. A tukah chuan kawtchhuaha nilum ai pahin kan thu khawm leh a. Kan khaw titi thiam chuan kan sangha tlang vuak chanchin chu a han sawi tak tak mai a leh! Kal ve vek e ti lo chuan ngaihnawm ti em em hian kan ngaithla thup mai a ni, a ti. Pun khawm nikhua hian pa titi thiam deuh chu khawilai kilkhatah emaw hian an bial laih laih chawk a ni.

Titi thiam leh lutuk pawh hi a awm ve thei tho awm mang e ka ti. Pa pakhat pawh hian Japan ral beih thu kha a sawi a. "Chutia hnim pik kara ka kun phei lai tak chuan ka chal darah tak mai hian a rawn verh siah mai a. Ka let tawp mai a. Ka thinrim lutuk chuan 'engnge ni na vei' tiin ka bawh phei ve ta a. Ka lailung dawt chuan a thin hnunah tak mai ka'n vit thawih mai a, a then nawi nawi mai a ni,' a ti e," an ti!

'Mizo mipa an titi khawm a, an nuih dur dur tawh chuan zahmawh an sawi a ni duh phian,' tih hi a dik thui viau em aw, ka ti. Heti lam sawi hi nuam kan ti phian mai. Tun hnaiah pawh Mizo zaithiam lar pakhat sex video put ru chungchang Mizo website hrang hrangah tarlan a ni a. Internet-a titi pha, Mizo zingah rau rau pawh 'intellectual'-a ngaih te meuh pawhin he thilin 'legal, social, theological, ethical issue' a rawn hrinchhuah sawi tur tam tak a awm laiin a zahmawh lam hawi kha sawi nuam kan tih a ni tlangpui tlat a ni.

Mizote tluka titi nuam ti hi khawvelah an tam bik lo hial ang. Kan tawng hmang hrim hrim hi a 'monologue' lem lo va, a 'dialogue' em em a ni, ti i la a dik ber awm e. Missionary te an lo chhuah pawh khan pakhatin thusawi a, ngaihthlak ngat ngat kha an thiam reng reng lo. Thusawi laiin 'I neck-tie kha engzat man nge?' tih mai mai kha an zawt an zawt mai a ni. Titi hnam kan nihna khan kawng leh lamah chuan chanchintha a ti darh chak hlauh thung. Sapho pawh khan 'Vawi khat sawi tawh chuan an sawi darh zung zung mai a ni' an ti.

Titi hi a tha zawng leh a chhe zawnga hman theih ve ve niin a lang. Mi dang pawisawi zawng leh ngaihthlak hrehawm zawnga titi loh tum hram i la, that tlanna tur leh thil tangkai pawchhuak zawngin titi uar i la a tha ngawt ang.

'A thilmak tih zawng zawng thu chu titi rawh u' kan Bible-in a tih ang khan Pathian thu te pawh hi titi nan hmang tam i la, kan tisual lo tawp ang le! Tuichhunchhuah bula Samari hmeichhia leh Emau kawnga thian duh pahnih Isua nena titi te pawh kha rilruin a hre chhuak rum rum mai!