His pain our gain
He milem chuang T-Shirt hi kum 2006-a OM Books, Chennai-a ka lei a ni. A hmaa thil inziak avang hian ka hmuh phat atangin he kawr hian min hip nghal a. A phuai deuh fap tawh hnu thlengin ka ha awl lo ta reng a ni. Tunah chuan khawi bawlhhlawh paihna hmunah emaw a tawih tan mek tawh ta ve ang.
Holy Week kan lo thleng leh ta a. Rilruin Good Friday leh Easter lam a hawi nasa lehzual ta. Chutih lai chuan ka ngaihhlut em em thin he T-Shirt thlalak hi ka hai chhuak nawlh mai a. A hun laia thil tam tak min ngaihtuah tirte chu rilruah a lo lang thar leh uai uai mai.
Lal Isua nun inkawlkalh (paradox) nasa lutuk mai hi thilmak a ni. Nunna tui kawltu kha kros lera tuihal a au kha a ni tlat a, chatuan nunna petu, mitthite kaithotu kha a mualpho thei ang bera tihhlum a ni a, thawkrim leh phurrit phurte tana chawlhna tiamtu kha thlan thisena far khawpa lungngaia mangang kha a ni tlat lawi si. Sualna nei lo mithianghlim, misual bawlhhlawh ber anga thiamloh chantir a ni tlat te hi a mak. Midangte tidamtu ropui khan mahni a inti dam thei tlat lo va, lei leh van Lal ni si khan mite hmuhsit leh endawng a hlawh tlat si. Pathian meuh han thih leh rih te hi khawvel ngaihtuahna atang chuan thil awmang lo lutuk a ni.
He thil inkawlkalh hi hrilhfiah dan kawng khat chauh a awm. Min hmangaih avangin Pathian anga awma, Pathian tluka awm chu thil thlakhlelh hleihtheihah a ruat lo va. Kan hausakna turin a rethei a, kan damna turin a tuar a, kan nunna turin a thi a lo ni!
Rilru hah avanga zanlaia han hui pap pap changte a lo awm a. Chutiang hunah te chuan tawngtaiin a lam han hawi i la, "Khatah khan ka kal tawh asin," tiin kawng a lo sat vek a, ka bo lohna turin chhawl a lo bang dim diam a. He kros thiltihtheihna avang hian, "Thih hlauhawmah kan awm, mahse hlimin kan zai," tih hla te hi mittui nen ka sa ta fo mai!
Hling lukhum i khum keiin lallukhum,
I thihna ka tan nunna a lo ni.
I thihna ka tan nunna a lo ni.
Pathian hmangaihna hi hei aia fiaha sawi thiam hi a va chakawm em!
20 comments:
Good friday lo awm turah hian Isua Krista hi kan sual vangin a thi a ni tih i hre nawn leh fo teh ang u. Khi T-Shirt khi a ngaihawm ve reuh khawp mai kan bal bawm ah khan a in hnawh zing ve thin khawp mai he he...
The Passion Week kan lo thleng leh ta reng mai.
Van Beram no zet hian
Ka sual zawng a kalpui
Krista inthawina thisen chuan
Sual ser a tireh thei
@fel_feltea, kan veng lam, a nawlpuiin artui, cake leh a behbawm intihhlimna lam bak an hriat tawh mang lohna ah hian i thil sawi hi a pawimawh zual ngawt mai. Khi T-shirt khi ka ngai ngawt asin kei pawh.
@samuelapa, ni e hei kan thleng leh der mai. Mi hian hla te hi an lo phuah thiam bik thin teh e tiraw..
A ngaihnawmin rilru a khawih hle mai hotupa.. Ni e, kan sual tlan nana hreawm tinreng tuara misual bum ber anga Cross lera khenbeh Lal Krista tawrhna hi keini mihring tawrh ve te nen chuan nep tak tur a ni. Keini chu khawvel sualah kan awm a, a ni erawh Van hmun ropui taka Lal thutthlenga thu a ni si a..
Lalrempuia hla "Golgotha" tih hla khan ka rilru a hneh fo thin. Golgotha ka lal tuarna, lei leh van inremna hmun, chhandamtu thihna hmunah chuan..Lungngaihna zawng zawng tuarin, hling lukhum leh kawrsen nan, thlaphangin a au, ka pa ka pa engahnge min kalsan, hnemtu an awm lo ka lalpa....
Nang leh kei, khawvel leh mi zawng zawng chhandan turin, van lalfa, a ropuina, kalsanin min chhandam ta..
Hmuhsitna, hreawmna, tihduhdanna a tuar laiin, ka tui a hal, tiin a au.. mahse, tuman tui an pe lo...
etc.. a ni a.. ka la hre dik em ka hre ta mai lo.. A hla thu hi a dik a ni..
Ekhai!!hotupa va ropui ve...thi thei lo kha kan sual tlan nan a rawn thi tlat mai te hi ngaihtuah chang hian amak ka ti thin!
@Puia, ni e hotupa, Lal Isua inpekna hi mihring ngaihtuahna hian a hre pha tak tak lo zawk niin ka hria. I hla rawn tarlan chu a tha hle tak mai.
@avena, a lawmawm e hotupa. Kan hlaah pawh '...thi thei lo thi' tih a awm tak kha maw le. Ni e, 'a mak' kan ti leh ringawt mai thin chu a nih ber hi!
I hla kha tunlai chu a lar vet vet khawp mai. Nalh ve tak chu a ni.
A lawmawm e. Good Friday ah pawh Office a ngaih tlat si chuan, a mood-ah chen a har khawp a, hetiang thu chhiar tur tha tak tak kan han hmu thin hi thinlung takin a lawmawm ka ti. I ziak tha khawp mai.
Kan tan thi a tho leh tan hian nun leh hun kan pe tlem khawp mai. A thupui ang hian a tuarna kha kan tan malsawmna a lo ni ta zawk a, chu chu kan hriat reng a pawimawh. Happy Easter Sunday. Nice post
@fel_feltea, keini hla tehlul min an lo duh ve chu a va lawmawm ve!
@Zaia, e khai hotupa, i va buai tak ve maw le aw... Buai tak kara hetiang thute i chhiar hram hram chu i fakawm zawk hle mai. A lawmawm thin e...
@Geminiboyz, thanks! Ni e, lal isua hi hman chang leh peih changa zui awm tawk velah hian kan ngai fo mai. Nangpawh happy Easter!
Mi tlai hne hne thin, tun tum erawh kawngherh tho thei hauh lova youniq chhiar hmabak nei ni a in hre si a ka'n awm pek chu. 'Better late than never'. Ka khawl thlun zawmtu ka pan theih veleha ka thil chhiar hian min hneh hle mai. 'Para' thumna laiah khi chuan i thutna chung hretah chuan i thu ve ngei ang maw le! Pathian hmangaihna hi - a dik asin - sawithiam aiin "CHAN THIAM" a va pawimawh hmel ve...
Tha leh pek e hotupa !
Happy Easter ! Lalpan awmpuiin veng che rawh se .
@CHHUNGAPA, ti lawmawm thin e. I comment hi a ril thei lutuk a, ka hrethiam lo lek lek chu a ni e:)) 'Chan thiam...' a dik lutuk ringawt. A chana chan a lo ni rinna lam thil hi chu...
@Sekibuhchhuak, thanks! Nang pawh happy Easter le, Ama awmpuina duhawm tak nen!
Happy Belated Easter, hotupa. Keipawh Easter chhung kha chu ka hmang tha ve deuhva, online pawh ka rawn online hman lo. Post pawh hmana ka ziah lawk tawh automatic in ka update tir, Easter lai a lo in publish turin :)
I hla chu a lyrics min lo mail teh a. Ka duh ve mai mai a. Kha an video ah pawh mitdel te an lang na kha
@illusionaire, a more belated Easter greetings to you! Kei pawh meeting leh holiday te hmangin hmun hrang hrangah ka teihawi a. mobile atanga mail check zawk bak ka online lo rei ta hle...
@fel_feltea, aw le, ka lo ngaihtuah dawn nia.
A ngaihnawm lehpek viau mai.
A ngaihnawm hle mai... i blog poh a changkangin tloh man a awm khop mai... :)
@mesi, thanks! Chaw thing her lum a ni ber e:)
@chda, chda.in saw a changkang zawk daih a lawm:) Keini ve zawng update pawh kan ti hlei thei lo a nih hi!
Post a Comment