Old Trafford: Munich Tunnel
February 6, 1958 a ni a. Manchester pan tur thlawhna, Airspeed Ambassador G-ALZU chuan Riem Airport, Belgrade chhuahsanin chawhnu dar 1:15 (GMT)-ah Munich Airport a rawn thleng a. Thlawhna tui thun zawka Manchester pana thlawh chhuah leh nghal tum an ni. He thlawhna chhungah hian Matt Busby-a hovin Manchester United team, Busby Babes an tih mai te leh staff te bakah journalists, photographers leh mi thenkhatte an chuang a, an vaiin mi 44 an ni.
A hma ni chiah hian United team hian UEFA ‘European Cup’ quarter-finals-ah Yagoslavian team ‘Red Star Belgrade chu hnehin semi-finals an lut a. Phurna nasa tak leh hmalam hun beiseina sang tak nen in lam an pan mek a ni. Amaherawhchu hemi ni hian khua a chhe em em a. Thlawhna tlan kawngah te chuan vur a awm nuaih bawk a. Reilotea Manchester thlen inbeisei an nih laiin tum angin thil a kal thei ta lo a ni.
Co-pilot Captain Reyment chuan chawhnu dar 2:19-ah thlawk chhuak tura an inpeih thu Munich control tower chu a hrilh a. Amaherawhchu engine lama fel lo awm avangin an hlawhchham ta tlat a. Minute 3 hnua thlawh chhuah an tum leh pawh chu a hlawhtling thei leh ta chuang lo a ni. Passenger zawng zawng thlawhna chhhuahsan a, inchhung lama lo chawl tura hrilh an ni a. Chutih lai chuan nasa takin vur a rawn tla leh ta zel bawk a. Chumi nia thlawh chhuah chu thil beiseiawm niin a lang ta lo. Player pakhat Duncan Edwards chuan heti hian in lamah telegram a lo thawn hman nghe nghe: “Thlawhna cancel vek a ni, naktukah lo haw ang. Duncan.”
Engine enfel nan zan khat tal riah a tul tur thu hrilh an ni nain pilot ber Captain Thain-a chuan fimkhur zawka thlawh chhuah theih mai a inring tlat a. Thlawhna an chhuahsan hnu minute 15 lekah passenger te chu thlawhnaa lut tura hrilh an ni leh ta a ni. Chutia thlawk chhuak tura an han inbuatsaih leh chu player thenkhat ngaih a tha thei tawh lo va. Thenkhatin a him deuh ringin a hnung lam an chuh a. Liam Wheland phei chu, “Hei hi kan thihna tur a ni ngei ang. Mahse ka inpeih e,” tiin a tawng chhuak nghe nghe a ni.
Thlawhna chu a tlankawng atang chuan chak takin a in khawh chhuak a. Airport hungna a sut tlang hnuah kawng sir lehlama In pakhat a su zui leh a. A darh ta chhuai mai a ni. Chutah mei alh nasa takin a rawn zui leh a. A chhunga chuang mi 21 chu chawp leh chilhin an thi nghal a, a hnuah mi pahnih dang an thi leh bawk.
Thi zingah hian United player pariat leh staff pathum an tel a. Player dam chhuak zinga mi Bobby Charlton chuan, an vanglai hun hmang tan chauh, football khawvela hma lam hun eng tak hmachhawn mek mi pariat zet mai an han thi chu runthlak a tihzia a sawi. He thil thleng hian kar lovah khawvel a nghawr chhuak nghal a ni.
February 6, 2008 khan Munich chhiatna lo thlen kum 50-na champha hi hman a ni a. He chhiatna atanga player dam khawchhuakte chu guests of honour an ni. He hunah hian Old Trafford stadium chhim lama South Stand hnuai phei tunnel chu Munich Tunnel tia hming thar puttir a ni ta a. Busby Babes ho hnuhma leh Munich chhiatna chungchang thuziak leh thlalak thahnem tak pho chhuah a ni.
Min kalpuitu Liliani hi Mancurian dik tak, United fan ruhkawl a lo ni bawk a. Tunnel chhung kan fan lai chuan he chhiatna lo thlen dan leh a lo thlen nia Manchester khawpui boruak te chu hnuk ulh teuhvin min hrilh a. Rilru a khawih duh ngei mai. United supporter ni ngai lem lo kei ngei pawhin ti hian hahipin ka rawn sawi chhawng ve leh ta hial nghe nghe a nih hi!
Watch Munich disaster news footage on Youtube
13 comments:
Pu Faka chu ziak ngaihnawm hle mai, a lungchhiat thlak hle bawk, mahse we will rise again an tih chu a lo dik khawp in a ang.
Manchester chu kei pawh ka support ngai lo, mahse chumi avang chuan an chanchin lungchhiatthlak tak hian min tawh dan a nep chuang lo, a bengvarthlak-in a ngaihnawm ka ti tak zet, i ziak thiam khawp mai leh nghal, hnuk a ulh teuh thei alawm.
Sap tawnga chhiar ai chuan Mizopa irawm chhuak ngei a he tragedy han ngaihthlak chuan hnuk a ti ulh thei mai dawn a lawm le!
@Tluanga, ti lawmawm e. Ni e Harold Hardman thusawi hi tuna an dinhmun ngaihtuah phei chuan a lo dik khawp mai. Kum 10 hnuah European cup an chawi
@Varte, ni e he chhiatna hi a lungchhiatthlak em mai a, tuarpui ve tur paw'n United fan nih kher pawh a lo ngai lo ve... I mi fak dernaah ka lawm e.
@VaiVa, i ti lawmawm e. Chhungte hnai vai an tel ve lem lo naa he chhiatna hi a runthlak em mai a, hnuk te pawh a ulh thei ve lek lek mai!
Hotupa chu a tak in i hmu tawh bik ania ...i awh awm hle mai a...man utd hi chu EPL ka en tan tirh 1998 vel atanga ka lo support ve bur thin kha ania...chhiar a man hla hle mai a!!
E khai! A va lunglenthlakin, a va bengvarthlak em! Kan hriat ve rei ruai kha, a hmuna kal ngeiin, kan tawng ngeiin i'n ziak a, kan vannei leh ta.
United ka tan loh dan tur chu Liverpool ka tan tih i hriat chuan i hrethiam ngei ang. Mahse he tragedy hi chuan English football ngaihventute chu engti zawng emaw tak chuan min khawih ngei a ni.
@avena, ni e hotupa a vanneihthlak khawp mai... Kan thian pakhat Madagascar lam mi kan kalpui ve a, ManUnited pawh lo la hre reng reng lo. Mizoramah ngaihlu an tam nen, a pamhmai mang e aw, ka ti vang vang mai maw le!
@Zaia, a ni ngawt asin, keipawh ka tan thin club chu a ni hauh lo va, tupawhin club ropui a ni tih kan phat theih loh an nih bakah he thil thleng kher hi chu a runthlak em mai a, eng emaw kawng tal chuan min tawk theuh hlawm zawng a nih hi!
Eng team nge a... manchester i rawn tih ve hi? An lar em? An thiam em? Kei chu ka football team ka hriat ve awm chhun chu ARSENALLL ho chauh hi a ni... tuna i team rawn sawi hi chu kan hre ve lo.
:-)
A great piece of information and a good read :) keep em coming!
Mit atlaiin beng avar leh ta hawk mai. Man Utd hi tun kum pawhhi an champ leh ang. Arsenal chu an sawp viau ang :-)
@illusionaire, hehe! an tang ulh lutuk ngai lo:)) Arsenal bakah hemi ten an kah thluk ho i hriat tel ngei ka ring bawk e:)
@mnowluck, thanks for dropping by and for the 'nice' comment as well!
@Sekibuhchhuak, A lawmawm thin e. illusionaire nena in inkarah hian thu lai lak harsa ka ti viau mai:))
Ka fan chak tak i fang a ni maw :). Busby babes te chanchin hi chuan lung a kuai a, hre ve phak suh ila, a documentary en ringawt pawhin a lungchhiatthlak. Vanduaina chu an tan hian malsawmna tam tak thlentu a ni ve tlain ka hria
@vana, hotupa ni e ka han fang ve thei hlauh chu vanneihthlak khawp mai. Ni e, an harsatna hian ManU hi khawvelah a chawi lar leh zualin anmahni pawh an insang mar lehzual a, malsawmna a llo ni chho ta zel chu a nih hi...
Post a Comment