Ka thusawi

He hringnun a thil pawimawh ber te zing ami chu damchhung ni chhiar thiam a ni. Bible hian mihring nun tawi zia hmun hrang hrangah kawng chi hrang hrangin a sawi a. Sawi miah lo mahse ngaihtuahna pangngai hmang thei chin chuan mihring nun hian tawp chin a nei a ni tih hi kan hai lo.

Mahni inbeisei hun taka thi ta chat kan la awm lo va, a upat dan indawta thih ngawt lah a ni hek lo. "Naktuk"-a thih inring hi "vawiinah" kan thi thin a, "nakin deuh" a thih inring hi "tunah" kan thi thin. Chuvangin kan damchhung hun tawite, a tawp hun tur pawh kan hriat loh hi chhiar thiam a tul a ni.

French philosopher hmingthang leh French revolution sulsutu pawimawh Voltaire-a kha a ropuizia khawvel hriat a ni. A thi tur mangang erawh chu hmuh hrehawm khawpa rapthlak niin an sawi. Amah enkawltu nurse phei chuan, "Europe ram hausakna zatve pawh hi min pe dawn se, khatianga thi tur rapthlak kha chu ka enkawl duh tawh lo," a ti niin an sawi hial.

Greek lal ropui Croesus a pawhin a hausakna leh a ropuina te chu a han thlir a, "Kei tluka engthawl hi an awm dawn em ni?" a ti thlawt mai a. Mahse a mifing pakhat Salon-a chuan, "Lalber, thih dawnah lo chuan engthawl thu an sawi mai mai ngai lo ve," tiin a lo chhang ve thung a. A thih dawnah chuan chu thusawi dikzia chu a hrechhuak ta a ni ngei ang, "Salon! Salon! Salon!" tiin a au ruai mai a ni an ti.

Billy Graham-an University pakhata thu a sawinaah chuan, "He university-a zirlaite hian thil engkim in zir thiam tawh. Nun dan erawh in thiam lo a ni," a ti. Khawvel finna leh thiamna lama mi ropui leh hriatna thuk tak nei si, nun dan thiam si lo an va tam em! Mi hausa leh ropui, an ban phak apiang hlah lo, hlim chuang si lo te hi an va tam ta em!

Mi hausa pakhat, kan Bible-in "mi a" a tih tlat si a awm. Chumi chuan a thil neih mai pawh ni lo, ama nunna ngei pawh neitu Pathian dah pawimawh hmasa lovin a hausakna sum leh paite chu a'n chhiar hmasa tlat mai pek a. "Mi a, zaninah hian i thlarau an laksak dawn che a ni, i thil dehchhuahte kha tuta nge ni ta ang le?" tih thu a dawng ta thut mai a ni.

Nun dan thiamna leh damchhung ni chhiar thiamna hi he khawvelin a pek theih finna, ropuina leh hausaknaah te hian a innghat lo va. Mihringin "chung lama thil awm" a hmuh thiam leh thiam lohvah a innghat zawk a ni. Min siamtu leh nunna neia min dintu Chungnungber Pathian hian kan nunah hmun laipui ber chang se, chumi thlir chung chuan nung i la, chumi atang chuan kan nun hi herh mil i la. Chhiar hmasak tur chhiar hmasain, thlir hmasak tur thlir hmasa i la, damchhung ni chhiar thiam kan lo ni ang a, finna thinlung pawh kan neih phah hial dawn a lo ni.

(Kumin kumthar ni khan Mizo tlemte inkhawmnaah thu ka sawi ve hlauh mai a. Ka sawi dan nia ka hriatin ka rawn ziak chhuak leh a ni.)