A ni zawk dawn lo'm ni?
Tunhnai atang khan Mizo thalai, ram danga lehkhazir leh hnathawka awm zingah mahni ram leh hnam zahpui riauna rilru a intuh thar nasa hle niin a lang. Ram changkang zawkah te kan han khawsa a, mi ram intodelh dan te, infrastructure lama kan la phak loh nasat ziate kan han hmu a. Chutih lai chuan kan development sum neih ang angte pawh kan politician leh official ten eiru zo zel niin kan hre bawk si a. Thiamna leh finna lamah mite la tluk lo em ema kan inhriat laiin India rama tribal dinhmun hniamzia te kan hre ve kar bawk si nen… Heng thil infinkhawm hian zahna kawnah min din tir ta ni ngei tur a ni. Hei hian nghawng chi hnih a nei niin a lang.Pakhatna, a tha zawngin min fuih. Mite finna, thiamna leh hmasawnna kan hmuh leh hriat te hi chonaah ngaiin ram leh hnam tana thawk sauh sauh tura min fuihtuah tamtakin kan hmang mek. Zahpuiawm nia kan hriatna tak hian kan ram siamthat a tulzia min hriat chian tir a, chuti lama thahnemngaihna chu nasa takin min neih tir. Hetianga rilru siam mek hi thalai intellectual ho zingah hian an awm nual. A lawmawm takzet a ni.
Pahnihna, mahni ram leh hnam ngei hmusit a, zahpui a, midang an chak tlatna min neih tir. Ram tana thil tha leh tangkai tih tum chuang lem lo, mahni ram leh chipuite sawichhiat leh zahpui lama ramtang ta kan nei ta nual mai. Mahse hei erawh a chiang viau: kan khawsakna te hi sangin changkang hle mahse, van sanga inbengbel thei khawpa nei nung pawh ni mah i la, Mizo nih zahpuiin Chinese/Japanese/Korean ni te pawhin lo inchhal ngawt thin mah i la Mizo, tribal dik tak kan nih a bang dawn chuang si lo. A hrechiang tu tan chuan choak arawn chang tawn ang maia mite nuihzat mai kan lo ni ang.
Kan ram hi zahpuiawm khawpin a lo chhe ta pawh a ni thei e. A chhiat nasat poh leh mawhphurhna la ngam, a chhe lai siamtha tura feh chhuak ngam pasaltha, hrin man awm fa ramin a mamawhna a zual thin, tih erawh hi chu kan hriat a va tha em! Kan ram hi hmuhsitawma lo awmin a lo hming chhe ta deuh a nih pawhin, “Hawh u, sawichhiat kan nih tawh loh nan i dinthar leh ang u,” kan ti tur a ni zawk dawn lo’m ni?
11 comments:
Chhiar man hla thin e. Ni e, kan ram chhiatna lai leh a thanmawhbawkna kan hmuh len a vang mai a kan ram kan hmusit a nih chuan kan inchhut ngun a ngai khawp ang. Nehemia anga mi huaisen, Pathian thi mi, " Hawh u i dinthar leh ang u " ti theitu tur hi kan van mamawh tak em !
sekibuhchhuak, ti lawmawm thin e. Dik lohna tam tak chu kan nei a, a constructive zawng chuan kan sawisel tur pawh a ni. Mahse mahni ram leh hnam ngei ar chuk tui lo khawpa kan han chhuah ta mai thin hi chu pawi ka lo ti ve thin. Mahni ram leh hnam hmusit zawnga changkan hi kei ka hlauh ber pakhat a ni reng fo mai.
Ni e, Pathian tih, ram hmangaih bawk, "a chhe lai siamthatu" ni ngam kan mamawh a nih ber hi maw!
I ziak tha leh pek hle mai. I ziah dan atang hian a leng ah kan ngai lui teh ang. Mi tupawh mahni nihna phatsan a mahni nihna ang a langchhuak ngamlo chu mi tenawm ani ang chiah hian, kan ramleh hnam kan phatan chuan mi tenawm kan ni tho tho dawn, khawvel ngaihah hlawhtlingin sang hle mahila, ngaihsan kan hlawh tak tak chuang lo ang.
I sawi ang hian he Zoram hian a mamawh chu a chhiatna lai ber pawh hrechiang a chhung a chengte hi a ni, chuvangin he ram hi kan phatsan thiang lo a, a chhiatna lai atangin kan dawm kang zawk tur a ni.
Kan pi leh pu lo din, kan hma a mi huai tam takte thisen a lei, Pathian zawn chhuah ram Zoram hi changkan san hi a ni lo a, hausak san chi a ni hek lo. 'Aw Zoram, Lo ding chhuak rawh, i tan khua a var dawn ta" tih hla kan sak rual hian keimahni thalai te hi hnathawk tur a kan pen chhuah ve nghal a ngai. Pen chhuak mai ni lovin, a phet a kan phet dawr dawr a hun ta tak zet niin ka hria. Mahse heng zawng zawng te hi Pathian hre chung leh rawn chungin a ni tur a ni.
Hotupa, ka beisei leh pek min hrethiam mai roh :)
amuana, e khai kan hotute, in thuziak hi a ngaihnawm thin a lawm le! I rawn sawi ho hi ka pawmpui thlap a che. A taka pen chhuah i rawn sawi te hi pawimawh ka ti khawp mai.
Kan ram hian duhthu a sam mawlh lo tih chu kan hre vek a. A chhiatna lai thiam taka sawi thei pawh kan tam. Sawi a ngaih hun pawh a awm. Chutih lai chuan chumi avanga rilru na ngawih ngawih, hmangaihna nena siamthat tum leh a hliam tuam dam tura thawkchhuak duh mi engzatnge awm? tih hi ka ngaihtuahna luahtu a ni fo thin.
Ekhai hotupa, i ziak dik ka ti hle mai. Kan pi leh kan puten thi leh thau pawlha thisen nena an lo lei chhuah Zoram hi kan hlamchhiah tur a ni lova, kan zahpui tur lah a ni hek lo, kan chhuangin kan chawilar hle zawk tur a ni. Israel faten kum sangthum an bo san tawh pawh an tung ding leh a, Jerusalem te hial pawh a hma aia ropui zawkin an din leh ang hian, he kan zoram hi kan din thar fo tur a ni.
Ka hna lamah ka buai bakah eng emaw chhan hrang hrang avangin blog lamah ka lut tam hman meuh lova, hei thu tha tak tak in lo ziak am, hotupa amuana comment te pawh a ngaihnawmin mi a tiphur thin hle mai.
a dik ngawt mai. Nehemia ang hruaitu tha, tawng chauh ni lo, thiltih a ram dinthar duhtu kan va mamawh tak em!
a dik ngawt mai. Nehemia ang hruaitu tha, tawng chauh ni lo, thiltih a ram dinthar duhtu kan va mamawh tak em!
@Puia: e khai hotupa hei min rawn uap leh thei a, kan phuisui leh ta viau e. Ni e, keipawh Jerusalem kulh dinthar leh thu hi kan ram dinhmun ka ngaihtuah hian ka rilruah a lo thar fo thin.
@mesjay: i rawn lenglut ve a, ka lawm e. I sawi ang hian 'a tak ram' hi kan thlen tum ni reng thei se a tha tur hi a nia le! Thusawi thiam ni lo a taka hna thawktu hi kan ramin a mamawh a ni si a...
Thuziak tha tak a ni e, a chawmnungtute thuziak pawh a belhchian dawl ka ti khawp mai. A mak ka tih chu kan ram hi a sawi apiangin kan vei em em a, siamthat leh a thatna tura han thawk tak tak hi chu kan tlachham lehlawi thinin ka hria
Midang tih turah kan ngai tlat a, politicianho kutah kan dah nite hian a lang fo mai
Pu Faka chu ziak tha hle mai....tunah kan thalai leh hnathawkte Mizoram pawn a awm te poh kan lekha zir leh hnathawhna ah thil tha, ram changkang zawk a an practisce te hi, Mizoram ah zir tum ve zel I la a tha in ka hria.
@LeaszRalte, a dik ngawt mai. Mahni hi kan indahtha deuh thin ni te pawh hian a lang. Achang hi chuan 'kan phun nasa ta lutuk mah mah ve bawk lo maw aw,' ka ti rum rum thin.
Tluanga, i thil sawi hi a pawimawh hle mai. Ramdanga awmte hian kan ram tana fehchhuak angin inngai vek thei i la. Awmzia zawng a nei mawlh ang maw le.
Post a Comment