Zalen ka ni lo vem ni?

Mizote hi hnam zalen tak, mitinte zalen taka an len theihna society nei nia insawi thin kan ni a. Nih pawh kan ni viau. Mahse tun hnai deuh atang khan zalen lo riaua inhria kan lo awm tan a. Kan ngaihsan sapho nunphung te kan han thlir a, mimal chanvo leh zalenna chawisang hnam an lo ni a. Chumi chu rilrua vawng ran chungin kan duhdana kan awm theihna tur daltu a lo awm apiangin chep ta riauvah kan lo inngai ve ta mai pawh a ni thei ang. Chutih laiin inzirtirna leh inkaihhruaina tha nei mumal si lo va ‘khap policy’ ngawr ngawr lo chawi vawng pawl kan lo awm ve bawk a. Engtiklai maha inmil ngai lo tur heng thil pahnih innawt tawn hian kan society-ah ‘tek’ a siam ta thin a ni. Hei hi ngaihtuah zui a ngai hle.

Mi awp bet a, hnuaichhiah a, zalenna hmang thei lo khawpa siam hi eng thatna dan mahin dik a ti thei ngai lo. Mitinte dikna leh chanvo humhim sak hi kan India danpui pawhin a tum a ni. Amaherawhchu ‘zalen’ tih hian mahni duh dan ang anga awm a kawk lo. Chintawk a awm. Mimal zalenna chang chawia midangte tana hnawksak leh chimawm zawnga awm hi zalenna hman khawlohna a ni. Midangte zalenna zah luat avanga thil tha pawh ti ngam lo leh sawi ngam lo khawpa awm hi thatna ziktluak lo a ni a. Mahni leh khawtlang tana tha lo tur pawh duh duha ti thei khawpa zalen nia inngaih tur lah a ni hek lo.

Tunlai Mizote zinga chep ta riau nia inhre thar, “It’s my life,” ti thla zen ho zingah hian hetianga zalenna hmang khaw lo hi an tam nge nge em aw, a tih theih. Khawtlang nunhona atana tha nia ngaih, ziak loh dan inhlanchhawn social control te pawh hnawk ti khawp leh midangte mitmei ven pawh tul ti lo khawpa zalen kan tum a nih chuan mahni duhdanin kan awm huai huai ang a, kan society hian kawng zawng a la bo ngei ang.